Sahihu i Buhariut — Hadithi 1742
132. Nënkapitulli: Ligjërimi gjatë ditëve të qëndrimit në Mina
1742. Nga: Abdullah ibn Omeri
Muhamed ibn Muthena na ka thënë: Na ka treguar Jezid ibn Haruni, e këtij i ka rrëfyer Asim ibn Muhamed ibn Zejdi, e ky nga babai i tij se Ibn Omeri (Allahu qoftë i kënaqur me të!) transmeton se Pejgamberi ﷺ, në Mina, ka thënë:
- “E dini cila ditë është sot?”
- Allahu dhe i Dërguari i Tij e dinë më së miri, - thanë të pranishmit.
- “Sot është ditë e shenjtë. E, a e dini cili vend është ky?”
- Allahu dhe i Dërguari i Tij e dinë më së miri.
- “Ky është vend i shenjtë. A e dini cili muaj është ky?”
- Allahu dhe i Dërguari i Tij e dinë më së miri.
- “Ky është muaj i shenjtë. Andaj, dijeni mirë se: gjaqet, pasuria dhe nderi juaj janë të shenjta sikurse shenjtëria e kësaj dite, në këtë muaj, në këtë vend.”
Hisham Ibn Gazi ka thënë: “Më ka lajmëruar Nafiu se Ibn Omeri ka thënë: “Ditën e Bajramit të Kurbanit, në Haxhin Lamtumirës, Pejgamberi ﷺ u ndal në vendin mes xhemrave dhe tha: “Sot është dita e haxhit të madh.” Pastaj, Pejgamberi ﷺ zuri të thotë: “O Allah, ji Dëshmitar!” - dhe ua dha lamtumirën të pranishmëve.” Njerëzit thoshin: “Ky është Haxhi Lamtumirës.”