59. Zanafilla e krijimit

Muhamed ibn Kethiri na ka thënë: Na ka rrëfyer Sufjani, e ky nga Xhami ibn Shedadi, e ky nga Safvan ibn Muhrizi se Imran ibn Husajni (Allahu qoftë i kënaqur me të!) tregon: “Një grup pjesëtarësh të fisit benu temim erdhën te Pejgamberi ﷺ, i cili u tha: “O benu temimë, përgëzohuni!” Ata i thanë: “Meqënëse na përgëzove, tani na jep diçka.” Atëherë, Pejgamberit ﷺ i ndryshoi fytyra. Kur erdhën banorët e Jemenit, Pejgamberi ﷺ u tha: “O banorë të Jemenit, pranojeni myzhdenë, pasi që benu temimët nuk e pranuan.” Ata i thanë: “E pranuam.” Atëherë, Pejgamberi ﷺ filloi të flasë rreth zanafillës së krijimit dhe Arshit. Papritmas erdhi një burrë dhe më tha: “O Imran, të ka ikur deveja.” Ah, sikur të mos largohesha!”

Omer ibn Hafs ibn Gijathi na ka thënë: Na ka treguar babai im, e këtij i ka treguar Ameshi, e këtij i ka treguar Xhami ibn Shedadi e ky nga Safvan ibn Muhrizi se Imran ibn Husajni (Allahu qoftë i kënaqur me të!) tregon: “Shkova te Pejgamberi ﷺ, ndërsa devenë e lidha për dere. Atëherë, erdhën disa pjesëtarë të fisit benu temim, të cilëve Pejgamberi ﷺ u tha: “Pranojeni myzhdenë, o benu temimë!” Ata i thanë: “Myzhdenë na dhe, tani na jep edhe pasuri.” Kjo ndodhi dy herë. Pastaj erdhën disa jemenas, të cilëve Pejgamberi ﷺ u tha: “Pranojeni myzhdenë, o banorë të Jemenit, sepse benu temimët nuk e pranuan.” Ata thanë: “E pranuam, o i Dërguari i Allahut.” Pastaj thanë: “Kemi ardhur të të pyesim rreth kësaj çështjeje.” Pejgamberi ﷺ u tha: “Allahu ka ekzistuar atëherë kur nuk ka ekzistuar asgjë përveç Tij. Arshi i Tij ka qenë mbi ujë. Në Dhikër (Pllakën e Ruajtur) shkroi çdo gjë dhe i krijoi qiejt dhe Tokën.” Papritmas dikush thirri: “Të iku deveja, o Ibn Husajn!” Kur dola, pashë se e kishte marrë rrugën nëpër vapë. Për Allahun, ah sikur ta kisha lënë (të ikte)!”

Isa na ka transmetuar nga Rakabe, e ky nga Kajs ibn Muslimi, e ky nga Tarik ibn Shihabi se Omeri (Allahu qoftë i kënaqur me të!) ka thënë: “Një ditë, Pejgamberi ﷺ u ngrit dhe na rrëfeu për fillimin e krijimit e deri te hyrja e banorëve të Xhenetit nëpër vendbanimet e tyre dhe banorëve të Zjarrit nëpër vendbanimet e tyre. Këtë e ka mësuar kush e ka mësuar dhe e ka harruar kush e ka harruar.”

Abdullah ibn Ebu Shejbe më ka treguar nga Ebu Ahmedi, e ky nga Sufjani, e ky nga Ebu Zinadi, e ky nga Arexhi se Ebu Hurejra (Allahu qoftë i kënaqur me të!) transmeton se Pejgamberi ﷺ ka thënë: “Allahu i Lartësuar ka thënë: “I biri i Ademit më shan, ndërsa atij nuk i takon të më shajë.” Po ashtu, ai më përgënjeshtron, porse as kjo nuk i takon. Sharje janë fjalët e tij se Unë kam fëmijë, ndërsa përgënjeshtrim janë fjalët e tij: “Ai nuk mund të më ringjallë siç më ka krijuar fillimisht.”

Kutejbe ibn Seidi na ka thënë: Na ka treguar Mugire ibn Abdurrahman Kurashiu, e ky nga Ebu Zinadi, e ky nga Arexhi se Ebu Hurejra (Allahu qoftë i kënaqur me të!) transmeton se i Dërguari i Allahut ﷺ ka thënë: “Kur Allahu i krijoi krijesat, në Librin e Tij, që gjendet tek Ai, mbi Arsh, shkroi: “Mëshira Ime ka mbizotëruar zemërimin Tim.”

Ali ibn Abdullahu na ka thënë: Na ka rrëfyer Ibn Uleje, e ky nga Ali ibn Mubareku, e këtij i ka treguar Jahja ibn Ebu Kethiri, e ky nga Muhamed ibn Ibrahim ibn Harithi se Ebu Seleme ibn Abdurrahmani, - i cili kishte një mosmarrëveshje me disa persona (për një tokë), shkoi tek Aishja (Allahu qoftë i kënaqur me të!) dhe ia përmendi mosmarrëveshjen, - e në atë rast ajo i tha: “O Ebu Seleme, lëre atë tokë, sepse i Dërguari i Allahut ﷺ ka thënë: “Atij që bën padrejtësi, duke ia zaptuar tokën dikujt, qoftë dhe sa një pëllëmbë, (Ditën e Kiametit), do t'i ngarkohen (në shpinë) shtatë të tilla.”

Bishr ibn Muhamedi na ka thënë: Na ka rrëfyer Abdullahu, e ky nga Musa ibn Ukbe, e ky nga Salimi se Abdullah ibn Omeri (Allahu qoftë i kënaqur me të!) transmeton se Pejgamberi ﷺ ka thënë: “Ai që zapton padrejtësisht, qoftë dhe një pjesë të vogël të një toke, Ditën e Kiametit do të fundoset sa shtatë të tilla.”

Muhamed ibn Muthena na ka thënë: Na ka treguar Abdulvehabi, e këtij i ka treguar Ejubi, e ky nga Muhamed ibn Sirini, e ky nga i biri i Ebu Bekretes se Ebu Bekrete (Allahu qoftë i kënaqur me të!) transmeton se Pejgamberi ﷺ ka thënë: “Koha është rikthyer siç ka qenë atëherë kur Allahu i ka krijuar qiejt dhe Tokën. Viti është dymbëdhjetë muaj, katër prej të cilëve janë të shenjtë: tre radhazi: dhul kade, dhul hixhe dhe muharrem, si dhe muaji rexheb i fisit mudar, që gjendet mes muajve xhumada dhe shaban.”

Ubejd ibn Ismaili më ka thënë: Na ka treguar Ebu Usame, e ky nga Hishami, e ky nga babai i tij se Seid ibn Zejdi (Allahu qoftë i kënaqur me të!) tregon se Erva e paditi atë te Mervani për shkak të një toke, - për të cilën ajo pretendonte se Seidi ia kishte zvogëluar. - Seidi tha: “Unë t'i pakësoj diçka nga e drejta e saj?! Betohem se e kam dëgjuar të Dërguarin e Allahut ﷺ të thotë: “Atij që ia zapton tokën dikujt padrejtësisht, qoftë dhe sa një pëllëmbë, (Ditën e Kiametit) do t'i ngarkohen (në shpinë) shtatë të tilla.”

Ibn Ebu Zinadi transmeton nga Hishami, e ky nga babai i tij se Seid ibn Zejdi i ka thënë: “Hyra te Pejgamberi ﷺ.”

Muhamed ibn Jusufi na ka thënë: Na ka treguar Sufjani, e ky nga Ameshi, e ky nga Ibrahim Tejmiu, e ky nga babai i tij se Ebu Dherri (Allahu qoftë i kënaqur me të!) tregon se Pejgamberi ﷺ, pas perëndimit të diellit, i ka thënë: “Vallë, e di ku shkon?” Unë i thashë: “Allahu dhe i Dërguari i Tij e dinë më së miri.” Ai tha: “Ai shkon të bëjë sexhde nën Arsh, pastaj kërkon leje dhe i jepet leje. Mund të ndodhë të bëjë sexhde e të mos i pranohet dhe të kërkojë leje e të mos i jepet dhe t'i thuhet: “Kthehu nga ke ardhur!”, në mënyrë që të lindë nga perëndimi.” Kjo përkon me fjalën e Allahut: “Dielli lundron për në vendin e vet të caktuar. Kështu e ka paracaktuar i Plotfuqishmi, i Gjithëdijshmi.” (Jasin, 38)

Musededi na ka thënë: Na ka treguar Abdulaziz ibn Muhtari, e këtij i ka treguar Abdullah Denaxhi, e këtij i ka treguar Ebu Seleme ibn Abdurrahmani se Ebu Hurejra (Allahu qoftë i kënaqur me të!) transmeton se Pejgamberi ﷺ ka thënë: “Ditën e Kiametit, Dielli dhe Hëna do të jenë të palosur.”

Jahja ibn Sulejmani na ka thënë: Na ka treguar Ibn Vehbiu, e këtij i ka rrëfyer Amri, e këtij i ka treguar Abdurrahman ibn Kasimi, e ky nga babai i tij se Ibn Omeri (Allahu qoftë i kënaqur me të!) transmeton se Pejgamberi ﷺ ka thënë: “Eklipsi i Diellit dhe Hënës nuk ndodh si pasojë e vdekjes ose lindjes së ndonjë njeriu, mirëpo ato janë argumente të Allahut. Andaj, kur ta shihni (eklipsin) duke ndodhur, faluni.”

Ismail ibn Ebu Uvejsi na ka thënë: Më ka treguar Maliku, e ky nga Zejd ibn Eslemi, e ky nga Ata ibn Jesari se Abdullah ibn Abasi (Allahu qoftë i kënaqur me ta!) transmeton se Pejgamberi ﷺ ka thënë: “Dielli dhe Hëna janë argumente të Allahut. Eklipsi i tyre nuk ndodh si pasojë e vdekjes ose lindjes së ndokujt. Andaj, kur ta shihni (eklipsin) duke ndodhur, përmendeni Allahun.”

Jahja ibn Bukejri na ka thënë: Na ka treguar Lejthiu, e ky nga Ukajli, e ky nga Ibn Shihabi, e këtij i ka rrëfyer Urve se Aishja (Allahu qoftë i kënaqur me të!) tregon: “Ditën kur ndodhi eklipsi i Diellit, i Dërguari i Allahut ﷺ u ngrit, mori tekbir (për të falur namaz) dhe lexoi gjatë (në kijam). Pastaj ra në ruku dhe qëndroi gjatë në të. U ngrit dhe tha: “Semiallahu limen hamideh (Allahu i përgjigjet atij që e falënderon)”, dhe vazhdoi të qëndrojë në këmbë siç ishte më parë, ku sërish lexoi gjatë, por më shkurt se herën e parë. Pastaj ra në ruku, ku qëndroi gjatë, por më shkurt se herën e parë dhe ra në sexhde, ku qëndroi gjatë. Njëjtë veproi edhe në rekatin e fundit dhe dha selam, ndërkohë Dielli ishte shfaqur tërësisht. Pastaj u ligjëroi njerëzve dhe, për eklipsin e Diellit dhe Hënës, u tha: “Ato janë argumente të Allahut. Eklipsi i tyre nuk ndodh për vdekjen ose lindjen e ndokujt, andaj, kur të shihni se (eklipsi) po ndodh, nxitoni me frikë për në namaz.”

Muhamed ibn Muthena më ka thënë: Na ka treguar Jahjai, e ky nga Ismaili, e këtij i ka treguar Kajsi se Ebu Mesudi (Allahu qoftë i kënaqur me të!) transmeton se Pejgamberi ﷺ ka thënë: “Eklipsi i Diellit dhe Hënës nuk ndodh si pasojë e vdekjes ose lindjes së ndokujt, por ato janë argumente të Allahut. Andaj, nëse i shihni të ndodhin, faluni.”

Ademi na ka thënë: Na ka treguar Shuëbe, e ky nga Hakemi, e ky nga Muxhahidi se Ibn Abasi (Allahu qoftë i kënaqur me të!) transmeton se Pejgamberi ﷺ ka thënë: “Jam ndihmuar me erën e lehtë të lindjes, kurse Adi (populli i Hudit ﷺ) është shkatërruar me erën e furishme të perëndimit.”

Mekij ibn Ibrahimi na ka thënë: Na ka treguar Ibn Xhurejxhi, e ky nga Atai se Aishja (Allahu qoftë i kënaqur me të!) tregon: “Kur Pejgamberi ﷺ shihte ndonjë re të dendur në qiell, endej sa andej, sa këndej, hynte brenda e dilte jashtë dhe i ndryshonte fytyra. Nëse binte shi, çlirohej. Kështu, Aishja e pyeti rreth kësaj, e në atë rast ai tha: “E si ta di, ndoshta ndodh sikur me atë popullin që patën thënë: “Dhe, kur panë një re që u duk se vinte në drejtim të luginave të tyre, ata thanë: “Kjo re po sjell shiun! Jo!, - u përgjigj ai, - kjo është ajo që ju e keni shpejtuar: një erë që bart një dënim të dhembshëm.” (Ahkaf, 24)

Hudbe ibn Halidi na ka thënë: Na ka treguar Hemami, e ky nga Katadja. [t]: Halife më ka thënë: Na ka treguar Jezid ibn Zureji, e këtij i ka treguar Seidi dhe Hishami, e këtyre u ka treguar Katadja, e këtij i ka treguar Enes ibn Maliku se Malik ibn Saësai (Allahu qoftë i kënaqur me të!) transmeton se Pejgamberi ﷺ ka rrëfyer: “Një natë te Qabeja, ndërkohë që isha as fjetur e as zgjuar, erdhi një burrë mes dy të tjerëve dhe më sollën një enë të artë të mbushur me urtësi dhe besim. Ma çanë gjoksin nga trakeja deri në diafragmë, brendësinë ma lanë me ujë Zemzemi, pastaj e mbushën me urtësi dhe iman. Më sollën një kafshë të bardhë, më të vogël se mushka e më të madhe se gomari, (që quhej) Burak. Dhe kështu u nisëm së bashku me Xhibrilin. Me të arritur në qiellin e dynjasë, Xhibrili i tha rojës së qiellit:

- Hape!

- Kush është? - tha roja.

- Xhibrili.

- E kush është me ty? - pyeti ai.

- Muhamedi.

- I është dërguar shpallja? - tha roja.

- Po, - iu përgjigj Xhibrili.

- Mirë se ka ardhur! Eh, çfarë vizitori i mirë që na paska ardhur! - tha roja.

Ndërkohë, shkova tek Ademi dhe e përshëndeta me selam, i cili më tha: “Mirë se ke ardhur, o bir e pejgamber!” Pastaj shkuam në qiellin e dytë. Aty na thanë:

- Kush është?

- Xhibrili, - iu përgjigj Xhibrili ﷺ.

- E kush është me ty? - pyeti ai.

- Muhamedi ﷺ.

- I është dërguar shpallja? - pyeti roja.

- Po, - iu përgjigj Xhibrili.

- Mirë se ka ardhur! Eh, çfarë vizitori i mirë që na paska ardhur! - tha roja.

Aty shkuam tek Isai dhe Jahjai, të cilët më thanë: “Mirë se ke ardhur, o vëlla e pejgamber!” Pastaj shkuam në qiellin e tretë. Aty na thanë:

- Kush është?

- Xhibrili, - iu përgjigj Xhibrili ﷺ.

- E kush është me ty? - pyeti ai.

- Muhamedi.

- I është dërguar shpallja? - pyeti roja.

- Po, - iu përgjigj Xhibrili.

- Mirë se ka ardhur! Eh, çfarë vizitori i mirë që na paska ardhur! - tha roja.

Aty shkova te Jusufi dhe e përshëndeta. Ai më tha: “Mirë se erdhe, o vëlla e pejgamber!” Pastaj shkuam në qiellin e katërt. Aty na thanë:

- Kush është?

- Xhibrili, - iu përgjigj Xhibrili ﷺ.

- E kush është me ty? - pyeti ai.

- Muhamedi ﷺ.

- I është dërguar shpallja? - pyeti roja.

- Po, - iu përgjigj Xhibrili.

- Mirë se ka ardhur! Eh, çfarë vizitori i mirë që na paska ardhur! - tha roja.

Aty shkova tek Idrisi dhe e përshëndeta. Ai më tha: “Mirë se erdhe, o vëlla e pejgamber!” Pastaj shkuam në qiellin e pestë. Aty na thanë:

- Kush është?

- Xhibrili, - iu përgjigj Xhibrili ﷺ.

- E kush është me ty? - pyeti ai.

- Muhamedi.

- I është dërguar shpallja? - tha roja.

- Po, - iu përgjigj Xhibrili.

- Mirë se ka ardhur! Eh, çfarë vizitori i mirë që na paska ardhur! - tha roja.

Aty shkuam te Haruni dhe e përshëndeta. Ai tha: “Mirë se vjen, o vëlla e pejgamber!” Pastaj shkuam në qiellin e gjashtë. Aty na thanë:

- Kush është?

- Xhibrili, - iu përgjigj Xhibrili ﷺ.

- E kush është me ty? - pyeti ai.

- Muhamedi.

- I është dërguar shpallja? Mirë se ka ardhur! E, çfarë vizitori i mirë që na paska ardhur! - tha roja.

Aty shkova te Musai dhe e përshëndeta. Ai më tha: “Mirë se vjen, o vëlla e pejgamber!” Kur u largova nga aty, ai filloi të qajë. E pyetën: “Përse po qan?” Ai tha: “O Zot, nga umeti i këtij djaloshi, që është dërguar pas meje, do të hyjnë në Xhenet më shumë sesa nga umeti im.”

Pastaj shkuam në qiellin e shtatë. Aty na thanë:

- Kush është?

- Xhibrili, - iu përgjigj Xhibrili ﷺ.

- E kush është me ty? - pyeti roja.

- Muhamedi, - tha Xhibrili.

Roja ia ktheu: “I është dërguar shpallja? Mirë se ka ardhur! Eh, çfarë vizitori i mirë që na paska ardhur!”

Aty shkova tek Ibrahimi dhe e përshëndeta. Ai më tha: “Mirë se erdhe, o bir e pejgamber!” Pastaj më ngritën te Bejtu Mamuri¹, për të cilën e pyeta Xhibrilin, e ai më tha: “Kjo është Bejtu Mamuri. Çdo ditë, aty falen shtatëdhjetë mijë melekë dhe, pasi dalin, nuk kthehen më kurrë dhe ajo është hera e fundit që hyjnë.” Pastaj m'u shfaq Sidretu Muntehaja, frutat e së cilës dukeshin sikurse qypet e Hexherit (emër vendi), ndërsa gjethet sikur veshë elefanti. Te rrënjët e saj ndodheshin katër lumenj: dy lumenj të fshehtë dhe dy të tjerë të dukshëm. Kur e pyeta Xhibrilin, më tha: “Dy të fshehtët derdhen në Xhenet, ndërsa dy të dukshmit janë Nili dhe Eufrati.”

Më pas m'u obliguan pesëdhjetë namaze. U nisa të kthehem derisa arrita te Musai, i cili më pyeti: “Çfarë bëre?” I thashë: “Më janë obliguar pesëdhjetë namaze.” Ai më tha: “Unë i njoh njerëzit më mirë se ti dhe kam vuajtur shumë nga benu israilët. Umeti yt nuk mund ta përballojë, andaj kthehu te Zoti yt dhe kërko prej Tij (të ta pakësojë).” Unë u ktheva dhe Ai m'i bëri dyzet namaze. Pastaj ndodhi e njëjta gjë dhe m'i bëri tridhjetë. Sërish ndodhi e njëjta gjë dhe Ai m'i bëri njëzet. Sërish e njëjta dhe Ai m'i pakësoi në dhjetë. Kur shkova te Musai, m'i tha të njëjtat gjëra, ndaj Allahu m'i bëri pesë namaze. Me të shkuar te Musai, më pyeti: “Çfarë bëre?” I thashë: “M'i pakësoi në pesë.” Ai sërish m'i tha të njëjtat gjëra, por unë i thashë: “Me kaq po ndalem.” Atëherë u dëgjua një thirrje: “Unë e vendosa obligimin Tim e ua lehtësova robërve të Mi dhe të mirën e shpërblej dhjetëfish.”

Hemami transmeton nga Katadja, e ky nga Haseni, e ky nga Ebu Hurejra, e ky nga Pejgamberi ﷺ (se ka thënë): "Në Bejtu Mamur.”

Hasen ibn Rabiu na ka thënë: Na ka treguar Ebu Ahvasi, e ky nga Ameshi, e ky nga Zejd ibn Vehbiu se Abdullahu (Allahu qoftë i kënaqur me të!) transmeton se i Dërguari i Allahut ﷺ, - i sinqerti që i është thënë e vërteta, - ka thënë: “Çdo njeriu i tubohet krijimi në mitrën e nënës së tij për dyzet ditë, pastaj, për po aq ditë, shndërrohet në copë gjaku të varur, më pas, për po aq ditë, shndërrohet në copë mishi (sikurse mishi i përtypur). Pastaj, Allahu dërgon një melek që urdhërohet me katër gjëra dhe i thuhet: “Shkruaje veprën, furnizimin dhe jetëgjatësinë e tij, si dhe, nëse do të jetë fatzi apo i lumtur (në botën tjetër).” Më pas, i fryhet shpirti në të. Ndodh që ndokush të punojë vepra të atilla, saqë nuk mbetet mes tij dhe Xhenetit më shumë se një kut, por libri i tij ia parakalon, rrjedhimisht punon vepra të banorëve të Zjarrit (dhe përfundon në të), si dhe anasjelltas, punon vepra të atilla, saqë nuk mbetet mes tij dhe Zjarrit më shumë se një kut, por libri ia parakalon, rrjedhimisht punon vepra të banorëve të Xhenetit (dhe përfundon në të).”

Muhamed ibn Selami na ka thënë: Na ka rrëfyer Mahledi, e këtij i ka rrëfyer Ibn Xhurejxhi, e këtij i ka rrëfyer Musa ibn Ukbe, e ky nga Nafiu, e ky nga Ebu Hurejra, e ky nga Pejgamberi ﷺ. Transmetimin e Mahledit e fuqizon Ebu Asimi nga Ibn Xhurejxhi i cili thotë: Më ka rrëfyer Musa ibn Ukbe, e ky nga Nafiu se Ebu Hurejra (Allahu qoftë i kënaqur me të!) transmeton se Pejgamberi ﷺ ka thënë: “Kur Allahu e do një rob, i thërret Xhibrilit: “Allahu e do filanin, andaj duaje edhe ti.” Kështu, edhe Xhibrili fillon ta dojë. Pastaj, Xhibrili thërret ndër banorët e qiellit: “Allahu e do filanin, andaj duajeni edhe ju.” Kështu, të gjithë banorët e qiellit fillojnë ta duan atë. Kështu, bëhet i pranueshëm edhe në Tokë.”

Muhamedi na ka thënë: Na ka treguar Ibn Ebu Merjemi, e këtij i ka rrëfyer Lejthiu, e këtij i ka treguar Ibn Ebu Xhaferi, e ky nga Muhamed ibn Abdurrahmani, e ky nga Urve ibn Zubejri se Aishja (Allahu qoftë i kënaqur me të!) ka thënë: “E kam dëgjuar të Dërguarin e Allahut ﷺ ka thënë: “Melekët zbresin mbi re dhe i përmendin çështjet e paracaktuara qiellore, kurse shejtanët i dëgjojnë (disa fjalë) vjedhurazi dhe ua tregojnë falltarëve duke i mbështjellë me njëqind gënjeshtra nga vetvetja.”

Ahmed ibn Junusi na ka thënë: Na ka treguar Ibrahim ibn Sadi, e këtij i ka treguar Ibn Shihabi, e ky nga Ebu Seleme dhe Agarri se Ebu Hurejra (Allahu qoftë i kënaqur me të!) transmeton se Pejgamberi ﷺ ka thënë: “Në ditën e premte, në çdo derë të xhamisë vendoset nga një melek, i cili i shkruan emrat (e atyre që hyjnë), një nga një. Kur imami ulet (në minber), ata i mbyllin fletushkat dhe vijnë për të dëgjuar hutben.”

Ali ibn Abdullahu na ka thënë: Na ka treguar Sufjani, e këtij i ka treguar Zuhriu se Seid ibn Musejebi tregon: “Teksa Hasani (Allahu qoftë i kënaqur me të!) po këndonte poezi, në xhami hyri Omeri. Ai i tha: “Këndoja poezi në këtë xhami, atëkohë kur në të ndodhej ai që ishte më i mirë se ti.” Pastaj u kthye nga Ebu Hurejra dhe i tha: “Po të bëj be në Allahun, a e ke dëgjuar të Dërguarin e Allahut ﷺ duke më thënë: “Përgjigju (atyre) për mua! O Allah, ndihmoje me Shpirtin e Shenjtë!”? Ai i tha: “Po.”

Hafs ibn Omeri na ka thënë: Na ka treguar Shuëbe, e ky nga Adij ibn Thabiti se Berai (Allahu qoftë i kënaqur me të!) tregon se Pejgamberi ﷺ i ka thënë Hasanit: “Sulmoji, - ose ka thënë: vërsulju, - sepse Xhibrili është me ty.”

Is'haku na ka thënë: Na ka rrëfyer Vehb ibn Xheriri, e këtij i ka treguar babai i tij, e ky e ka dëgjuar Humejd ibn Hilalin se Enes ibn Maliku (Allahu qoftë i kënaqur me të!) tregon: “Sikur po e shoh tani pluhurin që ngrihej nëpër rrugicën e fisit benu ganëm. Musai shton: “Nga ecja e Xhibrilit.”

Ferve na ka thënë: Na ka treguar Ali ibn Mus'hiri, e ky nga Hisham ibn Urve, e ky nga babai i tij se Aishja (Allahu qoftë i kënaqur me të!) tregon se Harith ibn Hishami e pyeti Pejgamberin ﷺ: “Si të vjen shpallja?” Ai iu përgjigj: “Më vjen në të gjitha format: ndonjëherë më vjen sikurse tingëllima e ziles dhe, kur (meleku) largohet, unë tanimë e kam nxënë atë që më është shpallur, lloj ky që është më i rëndi për mua; ndonjëherë meleku më paraqitet në formë të ndonjë burri dhe më flet, sakaq unë e mësoj atë që më thotë.”

Ademi na ka thënë: Na ka treguar Shejbani, e këtij i ka treguar Jahja ibn Ebu Kethiri, e ky nga Ebu Seleme se Ebu Hurejra (Allahu qoftë i kënaqur me të!) ka thënë: “E kam dëgjuar Pejgamberin ﷺ duke thënë: “Atë që i dhuron dy lloje të pasurisë në rrugën e Allahut, rojat e (portave të) Xhenetit do ta thërrasin: “O filan, eja këtu.” Në atë rast Ebu Bekri tha: “O i Dërguari i Allahut, ky është ai që nuk shkatërrohet.” Pejgamberi ﷺ ia ktheu: “Shpresoj që ti të jesh prej tyre.”

Abdullah ibn Muhamedi na ka thënë: Na ka treguar Hishami, e këtij i ka rrëfyer Mameri, e ky nga Zuhriu, e ky nga Ebu Seleme se Aishja (Allahu qoftë i kënaqur me të!) transmeton se Pejgamberi ﷺ iu drejtua asaj: “Oj Aishe, Xhibrili po të jep selam.” Ajo i tha: “Edhe mbi të qoftë paqja, mëshira dhe bekimi i Allahut! Ti sheh gjëra që unë nuk i shoh.”

Ebu Numani na ka thënë: Na ka treguar Omer ibn Dherri. [t]: Jahja ibn Xhaferi më ka thënë: Na ka treguar Vekiu, e ky nga Omer ibn Dherri, e ky nga babai i tij, e ky nga Seid ibn Xhubejri se Ibn Abasi (Allahu qoftë i kënaqur me të!) transmeton se i Dërguari i Allahut ﷺ i ka thënë Xhibrilit: “Vallë, pse nuk na viziton më shpesh?” Atëherë zbriti ajeti: “(Xhibrili tha): “Ne (melekët) zbresim vetëm me urdhrin e Zotit tënd. Atij i përket gjithçka që është para nesh, gjithçka që është pas nesh dhe gjithçka që është në mes. Dhe Zoti yt nuk harron kurrë.” (Merjem, 64)

Ismaili na ka thënë: Më ka treguar Sulejmani, e ky nga Junusi, e ky nga Ibn Shihabi, e ky nga Ubejdullah ibn Abdullah ibn Utbe ibn Mesudi se Ibn Abasi (Allahu qoftë i kënaqur me të!) transmeton se i Dërguari i Allahut ﷺ ka thënë: “Xhibrili ma ka lexuar Kuranin në një dialekt, por unë vazhdova t'i kërkoj më shumë, derisa përfunduam në shtatë dialekte.”

Muhamed ibn Mukatili na ka thënë: Na ka rrëfyer Abdullahu, e këtij i ka rrëfyer Junusi, e ky nga Zuhriu, e këtij i ka treguar Ubejdullah ibn Abdullahu se Ibn Abasi (Allahu qoftë i kënaqur me të!) ka thënë: “I Dërguari i Allahut ﷺ ka qenë njeriu më bujar, e bujaria e tij arrinte kulmin gjatë Ramazanit, kur e takonte Xhibrili. E takonte atë çdo natë Ramazani dhe e mësonte Kuranin me të. Kur të Dërguarin e Allahut ﷺ e takonte Xhibrili, në vepra të mira ka qenë më bujar sesa era që fryn (plot mirësi).”

Transmetohet nga Abdullahu se ka thënë: “Ngjashëm na ka treguar edhe Mameri, me këtë sened. Ebu Hurejra dhe Fatimja kanë transmetuar nga Pejgamberi ﷺ se Xhibrili ia lexonte Kuranin.”

Kutejbe na ka thënë: Na ka treguar Lejthiu se Ibn Shihabi tregon se Omer ibn Abdulazizi e vonoi pak namazin e ikindisë. Në atë rast Urve i tha: “Xhibrili ka zbritur dhe është falur para të Dërguarit të Allahut ﷺ.” Omeri ia ktheu: “Kujtohu mirë çfarë po flet, o Urve!” Urve i tha: “E kam dëgjuar Beshirin, të birin e Ebu Mesudit, të thotë: “E kam dëgjuar Ebu Mesudin se e ka dëgjuar të Dërguarin e Allahut ﷺ duke thënë: “Xhibrili zbriti dhe më priu në namaz, ndërsa unë u fala me të. Pastaj u fala me të. Pastaj u fala me të. Pastaj u fala me të. Pastaj u fala me të.” Dhe, me gishta, i numëroi pesë namaze.”

Muhamed ibn Beshari na ka thënë: Na ka treguar Ibn Ebu Adiu, e ky nga Shuëbe, e ky nga Habib ibn Ebu Thabiti, e ky nga Zejd ibn Vehbiu se Ebu Dherri (Allahu qoftë i kënaqur me të!) transmeton se Pejgamberi ﷺ ka thënë: “Xhibrili më tha: “Kushdo që vdes nga umeti yt pa i bërë ortak Allahut, do të hyjë në Xhenet, - ose ka thënë: nuk do të hyjë në Zjarr.” I thashë: “Edhe nëse bën zina, edhe nëse vjedh?” Pejgamberi ﷺ u përgjigj: “Edhe nëse (i bën ato).”

Ebu Jemani na ka thënë: Na ka rrëfyer Shuajbi, e këtij i ka treguar Ebu Zinadi, e ky nga Arexhi se Ebu Hurejra (Allahu qoftë i kënaqur me të!) transmeton se Pejgamberi ﷺ ka thënë: “Melekët ndërrohen me njëri-tjetrin: disa melekë natën, disa melekë ditën, e bashkohen në namazin e sabahut dhe të ikindisë. Kur ata që kanë qenë me ju ngrihen tek Allahu, Ai i pyet, ndonëse Ai e di më së miri: “Si i latë robërit e Mi?” Ata thonë: “I lamë duke u falur, ashtu siç i gjetëm, duke u falur.”

Muhamedi na ka thënë: Na ka rrëfyer Mahledi, e këtij i ka rrëfyer Ibn Xhurejxhi, e ky nga Ismail ibn Umeje, e këtij i ka treguar Nafiu, e këtij i ka treguar Kasim ibn Muhamedi se Aishja (Allahu qoftë i kënaqur me të!) tregon: “Pejgamberit ﷺ i përgatita një jastëk, në të cilin ndodheshin ca vizatime. Kur erdhi Pejgamberi ﷺ, i ndryshoi fytyra, andaj i thashë:

- Çfarë bëmë, o i Dërguari i Allahut?

- “Ç'është puna e këtij jastëku?” - pyeti Pejgamberi ﷺ.

- Thjesht jastëk, e kam bërë për ty, që të shtrihesh në të.

- “A nuk e di që melekët nuk hyjnë në atë shtëpi ku ka piktura (frymorësh) dhe se Ditën e Kiametit piktorët e këtyre pikturave do të dënohen e do t'u thuhet: “Jepuni jetë (po patët mundësi) gjërave që i keni vizatuar!” - i tha Pejgamberi ﷺ.”

Ibn Mukatili na ka thënë: Na ka rrëfyer Abdullahu, e këtij i ka rrëfyer Mameri, e ky nga Zuhriu, e ky nga Ubejdullah ibn Abdullahu, e ky e ka dëgjuar Ibn Abasin se Ebu Talhai (Allahu qoftë i kënaqur me të!) tregon: “E kam dëgjuar të Dërguarin e Allahut ﷺ duke thënë: “Melekët nuk hyjnë në një shtëpi ku ka qen dhe piktura frymorësh.”

Ahmedi na ka thënë: Na ka treguar Ibn Vehbiu, e këtij i ka rrëfyer Amri, e këtij i ka treguar Bukejr ibn Eshexhi, e këtij i ka treguar Busr ibn Seidi, e këtij i ka treguar Zejd ibn Halid Xhuheniu, - ndërkohë, bashkë me Busr ibn Seidin transmeton edhe Ubejdullah Havlaniu, i cili ka qenë thjeshtri i Mejmunes, bashkëshortes së Pejgamberit ﷺ, - pra këtyre dyve u ka treguar Zejd ibn Halidi se Ebu Talhai (Allahu qoftë i kënaqur me të!) transmeton se Pejgamberi ﷺ ka thënë: “Melekët nuk hyjnë në një shtëpi ku ka piktura (frymorësh).”

Busri tregon: “Zejd ibn Halidi u sëmur, andaj shkuam për ta vizituar. Duke qenë në shtëpinë e tij, pamë një perde me vizatime. Ubejdullah Havlaniut i thashë: “A nuk na ka transmetuar vetë hadithin rreth pikturave?” Ubejdullahu iu përgjigj: “Ai, po ashtu, ka transmetuar: “Përveç vizatimeve të jofrymorëve.” Vallë, nuk e paske dëgjuar?” Unë i thashë: “Jo.” Ai më tha: “Po, e ka përmendur edhe këtë.”

Jahja ibn Sulejmani na ka thënë: Më ka treguar Ibn Vehbiu, e këtij i ka treguar Omeri, e ky nga Salimi se Abdullah ibn Omeri (Allahu qoftë i kënaqur me të!) tregon se Xhibrili i ka thënë Pejgamberit ﷺ: “Ne nuk hyjmë në atë shtëpi ku ka piktura (frymorësh) apo qen.”

Ismaili na ka thënë: Më ka treguar Maliku, e ky nga Sumeji, e ky nga Ebu Salihu se Ebu Hurejra (Allahu qoftë i kënaqur me të!) transmeton se i Dërguari i Allahut ﷺ ka thënë: “Kur imami thotë: “Semiallahu limen hamideh”, thoni: “Allahume Rabena lekel hamd”, sepse atij, fjala e të cilit përputhet me fjalën e melekëve, i falen mëkatet e kaluara.”

Ibrahim ibn Mundhiri na ka thënë: Na ka treguar Muhamed ibn Fulejhu, e këtij i ka treguar babai i tij, e ky nga Hilal ibn Aliu, e ky nga Abdurrahman ibn Ebu Amra se Ebu Hurejra (Allahu qoftë i kënaqur me të!) transmeton se Pejgamberi ﷺ ka thënë: “Ju llogariteni se jeni në namaz për aq sa jeni duke e pritur namazin dhe melekët thonë: “O Allah, fale atë dhe mëshiroje!” - për sa kohë që nuk është larguar nga vendfalja ose nuk e prish abdesin.”

Ali ibn Abdullahu na ka thënë: Na ka treguar Sufjani, e ky nga Amri, e ky nga Atai, e ky nga Safvan ibn Jalai se Jala ibn Umeje (Allahu qoftë i kënaqur me të!) tregon: “E kam dëgjuar Pejgamberin ﷺ të lexojë në minber ajetin: “Ata thërrasin: “O Malik!” (Zuhruf, 77)

Abdullah ibn Jusufi na ka thënë: Na ka rrëfyer Ibn Vehbiu, e këtij i ka rrëfyer Junusi, e ky nga Ibn Shihabi, e këtij i ka treguar Urve se Aishja (Allahu qoftë i kënaqur me të!) tregon se e ka pyetur Pejgamberin ﷺ: “A keni përjetuar ndonjë ditë më të vështirë se ditën e Uhudit?” Ai ka thënë: “Kam përjetuar shumë gjëra të rënda prej popullit tënd. Por, gjëja më e vështirë që kam përjetuar prej tyre është dita e Akabesë, kur pata kërkuar mbështetjen e Ibn Abdujalil ibn Abdukulalit, por ai nuk pranoi atë që kërkova. Kështu, u nisa i brengosur e i zhytur në mendime, saqë nuk erdha në vete derisa arrita në vendin Karnu Thealib. Aty e ngrita kokën dhe ja, një re duke më bërë hije. Aty e pashë Xhibrilin, i cili më tha: “Allahu i ka dëgjuar fjalët e popullit tënd dhe refuzimin që të është bërë. Andaj, e ka dërguar melekun e maleve, që t'i japësh urdhër ç'të duash kundër tyre.” Meleku i maleve më përshëndeti dhe më tha: “O Muhamed! Kërko ç'të duash, madje, nëse dëshiron, do t'i përmbys dy malet (rreth Mekës) mbi ta.” Pejgamberi ﷺ i tha: “Përkundrazi, shpresoj që Allahu do të nxjerrë prej pasardhësve të tyre ndokënd që do ta adhurojë Allahun, të Vetmin, pa i bërë ortak asgjë.”

Kutejbe na ka thënë: Na ka treguar Ebu Avane se Ebu Is'hak Shejbaniu tregon: “E kam pyetur Zirr ibn Hubejshin rreth ajetit: “Qëndronte sa largësia midis dy harqeve ose edhe më afër. E i shpalli robit të Allahut, atë që i shpalli.” (Nexhm, 9-10) Ai u përgjigj: “Ibn Mesudi (Allahu qoftë i kënaqur me të!) na ka treguar se Pejgamberi ﷺ e ka parë Xhibrilin me gjashtëqind flatra.”

Hafs ibn Omeri na ka thënë: Na ka treguar Shuëbe, e ky nga Ameshi, e ky nga Ibrahimi, e ky nga Alkame se Abdullahu (Allahu qoftë i kënaqur me të!), në komentimin e ajetit: “Por ai pa disa nga mrekullitë më madhështore të Zotit të tij!”, (Nexhm, 18) ka thënë: “I ka parë flatrat e gjelbra (të Xhibrilit), që kishin mbuluar horizontin.”

Muhamed ibn Abdullah ibn Ismaili na ka thënë: Na ka treguar Muhamed ibn Abdullah Ensariu, e ky nga Ibn Avniu, e këtë e ka lajmëruar Kasimi se Aishja (Allahu qoftë i kënaqur me të!) ka thënë: “Kush pretendon se Muhamedi ﷺ e ka parë Zotin e vet, e ka tepruar. Por, ai e ka parë Xhibrilin në formën dhe natyrën e tij origjinale, teksa e kishte mbuluar tërë horizontin.”

Muhamed ibn Jusufi më ka thënë: Na ka treguar Ebu Usame, e këtij i ka treguar Zekerija ibn Ebu Zaide, e ky nga Ibn Eshvai, e ky nga Shabiu se Mesruku thotë: E pyeta Aishen (Allahu qoftë i kënaqur me të!): “Po ku po mbetet ajeti: “Pastaj iu afrua e iu lëshua, sa largësia midis dy harqeve ose edhe më afër.”? (Nexhm, 8-9) Aishja u përgjigj: “Ai ka qenë Xhibrili. Zakonisht i paraqitej në formën e njeriut, por këtë herë i qe paraqitur në formën e vet origjinale dhe e kishte zënë horizontin.”

Musai na ka thënë: Na ka treguar Xheriri, e këtij i ka treguar Ebu Rexhai se Semure (Allahu qoftë i kënaqur me të!) transmeton se Pejgamberi ﷺ ka thënë: “Sonte i kam parë dy burra, të cilët erdhën (dhe më morën). Ata më thanë: “Ai që e ndez Zjarrin është Maliku, rojtari i Zjarrit. Unë jam Xhibrili, ndërsa ky është Mikaili.”

Musededi na ka thënë: Na ka treguar Ebu Avane, e ky nga Ameshi, e ky nga Ebu Hazimi se Ebu Hurejra (Allahu qoftë i kënaqur me të!) transmeton se i Dërguari i Allahut ﷺ ka thënë: “Kur burri e fton bashkëshorten në shtrat dhe ajo refuzon, e në atë rast burri e kalon natën i hidhëruar me të, melekët do ta mallkojnë atë grua deri në mëngjes.”

Transmetimin e Ebu Avanes e kanë fuqizuar Shuëbe, Ebu Hamzai, Ibn Davudi dhe Ebu Muaviu nga Ameshi.

Abdullah ibn Jusufi na ka thënë: Na ka rrëfyer Lejthiu, e këtij i ka treguar Ukajli, e ky nga Ibn Shihabi, e ky e ka dëgjuar Ebu Selemen se Xhabir ibn Abdullahu (Allahu qoftë i kënaqur me ta!) tregon se e ka dëgjuar Pejgamberin ﷺ të thotë: “Pastaj, për një periudhë kohore, m'u vonua shpallja dhe, një ditë, teksa po ecja, dëgjova një zë nga qielli. Kur ngrita shikimin drejt qiellit, pashë melekun, që më ishte paraqitur në shpellën Hira, ulur në një karrige mes qiellit dhe Tokës. Aq shumë më kaploi frika nga kjo pamje, saqë rashë përtokë. Shkova në shtëpi dhe thashë: “Më mbuloni! Më mbuloni!” Atëherë Allahu i zbriti ajetet: “O ti i mbështjellë! Çohu dhe paralajmëro! Zotin tënd madhëroje! Petkat e tua pastroji dhe largohu nga ndyrësia!” (Mudethir, 1-5)

Ebu Seleme ka thënë: “Me fjalën "ndyrësia", janë për qëllim idhujt.”

Muhamed ibn Beshari na ka thënë: Na ka treguar Gunderi, e këtij i ka treguar Shuëbe, e ky nga Katadja. Halife më ka thënë: Na ka treguar Jezid ibn Zureji, e këtij i ka treguar Seidi, e ky nga Katadja, e ky nga Ebu Alije, e këtij i ka treguar i biri i xhaxhait të Pejgamberit ﷺ Ibn Abasi (Allahu qoftë i kënaqur me të!) transmeton se Pejgamberi ﷺ ka thënë: “Natën kur më ngritën në qiell, e pashë Musain ﷺ: një burrë i zeshkët, i gjatë dhe flokëdredhur, sikurse të ishte nga fisi shenue. Pastaj e pashë Isain ﷺ: një burrë mesatar, i kuq në të bardhë dhe flokëgjatë. Po ashtu, e pashë Malikun, rojtarin e Zjarrit, si dhe Dexhallin, në mesin e shumë mrekullive që Allahu m'i shfaqi. Andaj, mos ki dyshime rreth takimit me të.”

Enesi dhe Ebu Bekrete transmetojnë se Pejgamberi ﷺ ka thënë: “Melekët e ruajnë Medinën nga Dexhalli.”

Ahmed ibn Junusi na ka thënë: Na ka treguar Lejth ibn Sadi, e ky nga Nafiu se Abdullah ibn Omeri (Allahu qoftë i kënaqur me ta!) transmeton se i Dërguari i Allahut ﷺ ka thënë: “Atij që vdes, i shfaqet vendqëndrimi (i botës tjetër), mëngjes e mbrëmje. Nëse është banor i Xhenetit, (i shfaqet vendi) i banorëve të Xhenetit, e, nëse është banor i Zjarrit, (i shfaqet vendi) i banorëve të Zjarrit.”

Ebu Velidi na ka thënë: Na ka treguar Selm ibn Zeriri, e këtij i ka treguar Ebu Rexhai se Imran ibn Husajni (Allahu qoftë i kënaqur me të!) transmeton se Pejgamberi ﷺ ka thënë: “Shikova në Xhenet dhe pashë se shumica e banorëve të tij ishin të varfrit, pastaj shikova në Zjarr dhe pashë se shumica e banorëve të tij ishin gratë.”

Seid ibn Ebu Merjemi na ka thënë: Na ka treguar Lejthiu, e këtij i ka treguar Ukajli, e ky nga Ibn Shihabi, e këtij i ka rrëfyer Seid ibn Musejebi se Ebu Hurejra (Allahu qoftë i kënaqur me të!) ka thënë: “Teksa po rrinim me të Dërguarin e Allahut ﷺ, tha: “Duke qenë në gjumë, e pashë veten në Xhenet, ku pashë një grua duke marrë abdes pranë një pallati. Pyeta: “I kujt është ky pallat?” Më thanë: “I Omer ibn Hatabit.” Sakaq m'u kujtua xhelozia e tij, andaj u largova andej nga erdha.” Omeri filloi të qajë dhe tha: “A ndaj teje të xhelozoj, o i Dërguari i Allahut?”

Haxhaxh ibn Minhali na ka thënë: Na ka treguar Hemami, e ky e ka dëgjuar Ebu Imran Xhevniun, e këtij i ka treguar Ebu Bekër ibn Abdullah ibn Kajs Eshariu se babai i tij Ebu Musa Eshariu (Allahu qoftë i kënaqur me të!) transmeton se Pejgamberi ﷺ ka thënë: “Tendat (e Xhenetit) janë margaritarë të zgavruar për brenda, të gjata tridhjetë milje deri në qiell. Në çdo kënd të tyre qëndron nga një bashkëshorte e besimtarit dhe nuk e shohin njëra-tjetrën.”

Ebu Abdusamedi dhe Harith ibn Ubejdi transmetojnë nga Ebu Imrani se (Pejgamberi ﷺ) ka thënë: ”... gjashtëdhjetë milje.”

Humejdiu na ka thënë: Na ka treguar Sufjani, e këtij i ka treguar Ebu Zinadi, e ky nga Arexhi se Ebu Hurejra (Allahu qoftë i kënaqur me të!) transmeton se i Dërguari i Allahut ﷺ ka thënë: “Allahu ka thënë: “Për robërit e Mi të mirë kam përgatitur gjëra që syri nuk i ka parë, veshi nuk i ka dëgjuar dhe askujt nuk i ka shkuar në mendje.” Nëse doni, lexojeni ajetin: “Askush nuk di se çfarë kënaqësish janë fshehur për ta (në jetën tjetër)...” (Sexhde, 17)

Muhamed ibn Mukatili na ka thënë: Na ka rrëfyer Abdullahu, e këtij i ka rrëfyer Mameri, e ky nga Hemam ibn Munebihu se Ebu Hurejra (Allahu qoftë i kënaqur me të!) transmeton se i Dërguari i Allahut ﷺ ka thënë: “Grupi i parë që do të hyjnë në Xhenet do të kenë pamjen e hënës së plotë. Aty nuk pështyjnë, nuk u rrjedhin hundët dhe nuk kryejnë nevoja fiziologjike. Enët i kanë të arta, krehrit të artë e të argjendtë, parfumi i tyre është bima e aloesë, ndërsa djersët e tyre janë myshk. Secili posedon nga dy gra, të cilave, nga bukuria, u shihet palca e këmbëve përtej mishit. Nuk kanë mospajtime e as urrejtje mes vete dhe zemrat e tyre janë si një zemër e vetme. E madhërojnë Allahun mëngjes e mbrëmje.”

Ebu Jemani na ka thënë: Na ka rrëfyer Shuajbi, e këtij i ka treguar Ebu Zinadi, e ky nga Arexhi se Ebu Hurejra (Allahu qoftë i kënaqur me të!) transmeton se i Dërguari i Allahut ﷺ ka thënë: “Grupi i parë që do të hyjnë në Xhenet do të kenë pamjen e hënës së plotë, ndërsa të tjerët pas tyre si ylli më i shndritshëm. Zemrat e tyre janë si një zemër e vetme, nuk kanë mospajtime e as urrejtje mes vete. Secili posedon nga dy gra, të cilave, nga bukuria, u shihet palca e këmbëve përtej mishit. E madhërojnë Allahun mëngjes e mbrëmje. Nuk sëmuren, nuk u rrjedhin hundët dhe nuk pështyjnë. Do të kenë enë të arta e të argjendta, krehër të artë, materiali i parfumit të tyre është bima e aloesë, - Ebu Jemani ka thënë: “Janë për qëllim shkopinjtë aromatikë, - ndërsa djersët e tyre janë myshk.”

Muhamed ibn Ebu Bekër Makademi na ka thënë: Na ka treguar Fudajl ibn Sulejmani, e ky nga Ebu Hazimi se Sehël ibn Sadi (Allahu qoftë i kënaqur me të!) transmeton se Pejgamberi ﷺ ka thënë: “Shtatëdhjetë mijë veta prej umetit tim, - ose ka thënë: shtatëqind mijë, - do të hyjnë në Xhenet të gjithë së bashku, saqë të parët nuk hyjnë pa hyrë edhe të fundit. Fytyrat e tyre janë sikurse hëna e plotë.”

Abdullah ibn Muhamed Xhufiu na ka thënë: Na ka treguar Junus ibn Muhamedi, e këtij i ka treguar Shejbani, e ky nga Katadja se Enesi (Allahu qoftë i kënaqur me të!) tregon: “Pejgamberit ﷺ i dhuruan një xhybe mëndafshi, saqë njerëzit u mahnitën nga bukuria e saj, ndërkohë ai kishte ndaluar përdorimin e mëndafshit (për burra).” Ai tha: “Betohem në Atë, në Dorën e të Cilit është shpirti i Muhamedit, se mindilët (shamitë e dorës) e Sad ibn Muadhit në Xhenet janë më të mirë se kjo.”

Musededi na ka thënë: Na ka treguar Jahja ibn Seidi, e ky nga Sufjani, e këtij i ka treguar Ebu Is'haku se Bera ibn Azibi (Allahu qoftë i kënaqur me të!) tregon: “Të Dërguarit të Allahut ﷺ i sollën një xhybe mëndafshi dhe njerëzit filluan të habiten nga bukuria dhe butësia e saj.” Por, i Dërguari i Allahut ﷺ u tha: “Mindilët (shamitë e dorës) e Sad ibn Muadhit në Xhenet janë më të çmueshëm se kjo.”

Ali ibn Abdullahu na ka thënë: Na ka treguar Sufjani, e ky nga Ebu Hazimi se Sehël ibn Sad Saidiu (Allahu qoftë i kënaqur me të!) transmeton se i Dërguari i Allahut ﷺ ka thënë: “Një copë toke sa kamxhiku në Xhenet është më i çmueshëm se dynjaja dhe çfarë ka në të.”

Revh ibn Abdulmumini na ka thënë: Na ka treguar Jezid ibn Zureji, e këtij i ka treguar Seidi, e ky nga Katadja se Enes ibn Maliku (Allahu qoftë i kënaqur me të!) transmeton se Pejgamberi ﷺ ka thënë: “Në Xhenet është një pemë, në hijen e së cilës njeriu kalëron njëqind vjet, por prapë nuk e përshkon.”

Muhamed ibn Sinani na ka thënë: Na ka treguar Fulejh ibn Sulejmani, e këtij i ka treguar Hilal ibn Aliu, e ky nga Abdurrahman ibn Ebu Amra se Ebu Hurejra (Allahu qoftë i kënaqur me të!) transmeton se Pejgamberi ﷺ ka thënë: “Në Xhenet është një pemë, në hijen e së cilës njeriu kalëron njëqind vjet. Po deshët, lexojeni ajetin: “Në hije të gjera.” (Vakia, 30)

Ebu Hurejra (Allahu qoftë i kënaqur me të!) transmeton se Pejgamberi ﷺ ka thënë: “Një copë vend sa maja e harkut të shigjetës, në Xhenet, është më e çmueshme sesa tërë ajo që dielli përshkon sa lind e perëndon.”

Ibrahim ibn Mundhiri na ka thënë: Na ka treguar Muhamed ibn Fulejhu, e këtij i ka treguar babai i tij, e ky nga Hilali, e ky nga Abdurrahman ibn Ebu Amra se Ebu Hurejra (Allahu qoftë i kënaqur me të!) transmeton se Pejgamberi ﷺ ka thënë: “Grupi i parë që do të hyjnë në Xhenet do të kenë pamjen e hënës së plotë, ndërsa të tjerët pas tyre si ylli më i shndritshëm. Zemrat e tyre janë si një zemër e vetme, nuk kanë urrejtje e as xhelozi mes vete. Secili posedon nga dy gra prej hyrive sybukura, të cilave (nga bukuria) u shihet palca e këmbëve përtej ashtit dhe mishit.”

Haxhaxh ibn Minhali na ka thënë: Na ka treguar Shuëbe, e këtij i ka rrëfyer Adij ibn Thabiti se Bera ibn Azibi (Allahu qoftë i kënaqur me të!) tregon se, kur vdiq Ibrahimi (i biri Pejgamberit ﷺ), Pejgamberi ﷺ tha: “Ai ka një gjidhënëse në Xhenet.”

Abdulaziz ibn Abdullahu na ka thënë: Më ka treguar Malik ibn Enesi, e ky nga Safvan ibn Sulejmi, e ky nga Ata ibn Jesari se Ebu Seid Hudriu (Allahu qoftë i kënaqur me të!) transmeton se Pejgamberi ﷺ ka thënë: “Banorët e Xhenetit do t'i shohin banorët e dhomave sipër tyre ashtu si i shihni ju yjet e shndritshme të largëta në horizontin e lindjes ose perëndimit. Kjo, për shkak të dallimeve mes tyre.” E pyetën: “O i Dërguari i Allahut, a janë ato vendbanimet e pejgamberëve, rrjedhimisht askush përveç tyre nuk arrin atje?” Ai u përgjigj: “Përkundrazi, betohem në Atë, në Dorën e të Cilit është shpirti im, se ata janë burra që vërtet e kanë besuar Allahun dhe u janë përgjigjur pejgamberëve.”

Seid ibn Ebu Merjemi na ka thënë: Na ka treguar Muhamed ibn Mutarrifi, e këtij i ka treguar Ebu Hazimi se Sehël ibn Sadi (Allahu qoftë i kënaqur me të!) transmeton se Pejgamberi ﷺ ka thënë: “Në Xhenet janë tetë porta, njëra prej tyre quhet Rejan, nëpër të cilën do të hyjnë vetëm agjëruesit.”

Po ashtu, Pejgamberi ﷺ ka thënë: “Ai që i dhuron dy lloje të pasurisë, thirret nga porta e Xhenetit.”

Këtë e transmeton edhe Ubade nga Pejgamberi ﷺ.

Ebu Velidi na ka thënë: Na ka treguar Shuëbe, e ky nga Muhaxhir Ebu Haseni, e ky e ka dëgjuar Zejd ibn Vehbiun se Ebu Dherri (Allahu qoftë i kënaqur me të!) tregon se ishte me Pejgamberin ﷺ në një udhëtim, kur Pejgamberi ﷺ i tha: “Prit, derisa të freskohet!”, pastaj sërish tha: “Prit, derisa të freskohet!” derisa doli hija e kodrinës, pastaj tha: “Faleni namazin kur të freskohet, sepse të nxehtët e tepërt është pjesë e afshit të Xhehenemit.”

Muhamed ibn Jusufi na ka thënë: Na ka treguar Sufjani, e ky nga Ameshi, e ky nga Dhekvani se Ebu Seidi (Allahu qoftë i kënaqur me të!) transmeton se Pejgamberi ﷺ ka thënë: “Shtyjeni namazin (e drekës) derisa të freskohet (moti), sepse të nxehtët e tepërt është pjesë e afshit të Xhehenemit.”

Ebu Jemani na ka thënë: Na ka rrëfyer Shuajbi, e ky nga Zuhriu, e këtij i ka treguar Ebu Seleme ibn Abdurrahmani se Ebu Hurejra (Allahu qoftë i kënaqur me të!) transmeton se i Dërguari i Allahut ﷺ ka thënë: “Xhehenemi iu ankua Zotit të vet, e i tha: “O Zoti im! Kam filluar ta ha vetveten!” Andaj, ia mundësoi dy frymëmarrje:

1. Njërën gjatë dimrit,

2. Kurse tjetrën gjatë verës. Pjesë e kësaj janë vapa e madhe dhe acari i tepërt që ndieni ju.”

Abdullah ibn Muhamedi më ka thënë: Na ka treguar Ebu Amiri, e këtij i ka treguar Hemami se Ebu Xhemra Dubeiu tregon: “E shoqëroja Ibn Abasin (Allahu qoftë i kënaqur me të!) në Mekë dhe, një ditë, më kaploi zjarrmia, e në atë rast ai më tha: “Freskohu me ujë Zemzemi, sepse i Dërguari i Allahut ﷺ ka thënë: “Zjarrmia është pjesë e afshit të Xhehenemit, andaj freskojeni me ujë, - ose ka thënë: me ujë Zemzemi”, - Hemami ishte në mëdyshje.

Amër ibn Abasi më ka thënë: Na ka treguar Abdurrahmani, e këtij i ka treguar Sufjani, e ky nga babai i tij, e ky nga Abaje ibn Rifae se Rafi ibn Hadixhi (Allahu qoftë i kënaqur me të!) tregon: “E kam dëgjuar Pejgamberin ﷺ të ketë thënë: “Zjarrmia është pjesë e afshit të Xhehenemit, andaj freskojeni me ujë.”

Malik ibn Ismaili na ka thënë: Na ka treguar Zuhejri, e këtij i ka treguar Hishami, e ky nga Urve se Aishja (Allahu qoftë i kënaqur me të!) transmeton se Pejgamberi ﷺ ka thënë: “Zjarrmia është pjesë e afshit të Xhehenemit, andaj freskojeni me ujë.”

Musededi na ka thënë: Na ka treguar Jahja, e ky nga Ubejdullahu, e këtij i ka treguar Nafiu se Ibn Omeri (Allahu qoftë i kënaqur me të!) transmeton se Pejgamberi ﷺ ka thënë: “Zjarrmia është pjesë e afshit të Xhehenemit, andaj freskojeni me ujë.”

Ismail ibn Ebu Uvejsiu na ka thënë: Më ka treguar Maliku, e ky nga Ebu Zinadi, e ky nga Arexhi se Ebu Hurejra (Allahu qoftë i kënaqur me të!) transmeton se i Dërguari i Allahut ﷺ ka thënë: “Zjarri juaj është një e shtatëdhjeta pjesë e zjarrit të Xhehenemit.” Dikush i tha: “O i Dërguari i Allahut, edhe po të ishte sa zjarri i dynjasë, do të ishte i mjaftueshëm.” Ai tha: “Ai (zjarri i Xhehenemit) është për gjashtëdhjetë e nëntë hise më i nxehtë. Secila hise ka nxehtësinë e zjarrit të dynjasë.”

Kutejbe ibn Seidi na ka thënë: Na ka treguar Sufjani, e ky nga Amri, e ky e ka dëgjuar Atain, e ky nga Safvan ibn Jala se Jala ibn Umeje (Allahu qoftë i kënaqur me të!) tregon: “E kam dëgjuar Pejgamberin ﷺ të lexojë në minber ajetin: “Ata thërrasin: “O Malik!” (Zuhruf, 77)

Aliu na ka thënë: Na ka treguar Sufjani, e ky nga Ameshi se Ebu Vaili tregon: “Dikush i tha Usames (Allahu qoftë i kënaqur me të!): “Sikur të shkoje te filani (Othmani) dhe të flisje me të (rreth fitnes).” Ai u tha: “Ju po mendoni se nuk flas me të meqë nuk po ju tregoj?! Unë flas me të (për këto çështje) në fshehtësi, pa hapur një derë (atë të fitnes), gjë që nuk dua të jem unë i pari që e hap atë derë. Pas një hadithi që e kam dëgjuar prej të Dërguarit të Allahut ﷺ, askujt nuk i them se është më i miri i njerëzve, madje edhe në qoftë prijësi im.” Ata e pyetën: “E çfarë e ke dëgjuar të thotë? E kam dëgjuar të thotë: “Ditën e Kiametit, njeriu do të sillet dhe do të hidhet në Zjarr, ku do t'i përhapen zorrët nëpër zjarr. Ai do të ecë rreth tyre siç ecën gomari rreth rrotës së mullirit. Banorët e Zjarrit do të tubohen rreth tij dhe do ta pyesin: “O filan, ç'është puna jote? A nuk urdhëroje për të mirë e na ndaloje të keqen (në dynja)?” Ai do të përgjigjet: “Ju urdhëroja për të mirë, porse vetë nuk e punoja, si dhe ju ndaloja të keqen, porse vetë e punoja.”

E transmeton edhe Gunderi nga Shuëbe, e ky nga Ameshi.

Ibrahim ibn Musai na ka thënë: Na ka rrëfyer Isai, e ky nga Hishami, e ky nga babai i tij se Aishja (Allahu qoftë i kënaqur me të!) ka thënë: “Pejgamberit ﷺ iu bë sihër dhe, si pasojë e kësaj, i përfytyrohej se bënte diçka, të cilën në realitet nuk e bënte. Kështu vazhdoi derisa një ditë u lut gjatë, pastaj më tha: “E di se Allahu më lajmëroi ku e kam shërimin? Erdhën dy burra dhe njëri u ul te koka ime, ndërsa tjetri te këmbët. Njëri i tha tjetrit:

- Çfarë sëmundjeje ka ky burrë?

- I është bërë sihër, - tha tjetri.

- Kush i ka bërë sihër? - pyeti i pari.

- Lebid ibn Asami.

- Në çfarë?

- Në krehër me flokë dhe thekun e hurmës.

- Ku janë të vendosura këto?

- Në Pusin Dhervan, - tha tjetri.”

Kështu, Pejgamberi ﷺ shkoi atje dhe, kur u kthye, më tha: “Frutat e kësaj hurme (afër pusit) dukeshin si koka shejtanësh.” Unë e pyeta: “E nxore, vallë (sihrin ose sihërbazin)?” Ai më tha: “Jo, sepse Allahu më ka shëruar dhe u frikësova se mund të nxiste telashe ndër njerëz.” Më pas, pusi u mbyll tërësisht.”

Ismail ibn Ebu Uvejsi na ka thënë: Më ka treguar vëllai im, e ky nga Sulejman ibn Bilali, e ky nga Jahja ibn Seidi, e ky nga Seid ibn Musejebi se Ebu Hurejra (Allahu qoftë i kënaqur me të!) transmeton se i Dërguari i Allahut ﷺ ka thënë: “Atij që bie në gjumë, shejtani ia lidh tri nyja pas kokës dhe, duke e goditur secilën nyjë (thotë): “Qoftë një natë e gjatë për ty, andaj fli!” Nëse (personi) zgjohet dhe e përmend Allahun, i zgjidhet njëra nyjë. Nëse merr abdes, i zgjidhet nyja tjetër. Dhe, nëse falet, i zgjidhen të gjitha nyjat, rrjedhimisht gdhihet aktiv dhe shpirtmirë, në të kundërtën, gdhihet shpirtkeq dhe dembel.”

Othman ibn Ebu Shejbe na ka thënë: Na ka treguar Xheriri, e ky nga Mensuri, e ky nga Ebu Vaili se Abdullahu (Allahu qoftë i kënaqur me të!) tregon se një njeri u përmend në prani të Pejgamberit ﷺ, për të cilin u tha se ka fjetur tërë natën deri në mëngjes (pa u ngritur të falet). Atëherë Pejgamberi ﷺ tha: “Shejtani ka urinuar në dy veshët e tij, - ose ka thënë: në veshin e tij.”

Musa ibn Ismaili na ka thënë: Na ka treguar Hemami, e ky nga Mensuri, e ky nga Salim ibn Ebu Xhadi, e ky nga Kurejbi se Ibn Abasi (Allahu qoftë i kënaqur me të!) transmeton se Pejgamberi ﷺ ka thënë: “Kur dikush prej jush i afrohet bashkëshortes së vet (për marrëdhënie seksuale) dhe thotë: “Bismilah, Allahume xhenibna shejtane ve xhenibi shejtane ma razaktena (Me emrin e Allahut. O Allah, largoje shejtanin prej nesh dhe largoje prej pasardhësit tonë)!”, nëse u është caktuar të furnizohen me fëmijë, atëherë shejtani nuk do të mund ta dëmtojë atë.”

Muhamedi na ka thënë: Na ka rrëfyer Abde, e ky nga Hisham ibn Urve, e ky nga babai i tij se Ibn Omeri (Allahu qoftë i kënaqur me të!) transmeton se i Dërguari i Allahut ﷺ ka thënë: “Kur disku i diellit fillon të lindë, mos u falni, derisa të shfaqet tërësisht. Dhe, kur disku i diellit fillon të perëndojë, mos u falni, derisa të perëndojë tërësisht.”

Ibn Omeri (Allahu qoftë i kënaqur me të!) transmeton se Pejgamberi ﷺ ka thënë: “Mos falni namaz, qëllimisht, gjatë lindjes së diellit, as gjatë perëndimit të tij. Kjo, sepse ai lind mes dy brirëve të shejtanit.”

Ebu Mameri na ka thënë: Na ka treguar Abdulvarithi, e këtij i ka treguar Junusi, e ky nga Humejd ibn Hilali, e ky nga Ebu Salihu se Ebu Seidi (Allahu qoftë i kënaqur me të!) transmeton se Pejgamberi ﷺ ka thënë: “Nëse dikush falet në drejtim të sutrës, ndërkohë dikush tjetër tenton t'i kalojë përpara tij, le ta ndalojë. Nëse refuzon (të kthehet), sërish le ta ndalojë. Nëse refuzon për së treti, le t'i kundërvihet (me forcë), sepse i tilli është shejtan.”

Othman ibn Hejthemi na ka thënë: Na ka treguar Aufi, e ky nga Muhamed ibn Sirini se Ebu Hurejra (Allahu qoftë i kënaqur me të!) tregon: “I Dërguari i Allahut ﷺ më autorizoi ta ruaja sadakanë e (fitrit të) Ramazanit. Kështu, një person kishte ardhur dhe kishte filluar të merrte ushqim (nga sadakaja e fitrit), por unë e zura dhe i thashë: “Do të të dërgoj tek i Dërguari i Allahut ﷺ.” Pastaj, përmendi pjesën tjetër të ngjarjes dhe tha: “Ai (personi që merrte ushqim pa leje) më tha: “Kur të shtrihesh në shtrat, lexoje Ajetin Kursi. (Nëse vepron kështu,) një rojtar i Allahut do të të ruajë dhe nuk do të të afrohet asnjë shejtan deri në mëngjes.” Pejgamberi ﷺ më tha: “Ta ka thënë të vërtetën, edhe pse është gënjeshtar i madh. Ai ka qenë shejtani.”

Jahja ibn Bukejri na ka thënë: Na ka treguar Lejthiu, e ky nga Ukajli, e ky nga Ibn Shihabi, e këtij i ka rrëfyer Urve se Ebu Hurejra (Allahu qoftë i kënaqur me të!) transmeton se i Dërguari i Allahut ﷺ ka thënë: “Shejtani i shkon ndokujt dhe i thotë: “Kush e ka krijuar këtë? Kush e ka krijuar atë?” Derisa t'i thotë: “Kush e ka krijuar Zotin tënd?” Nëse arrin deri aty, atëherë (njeriu) le të kërkojë mbrojtjen e Allahut dhe le të ndalet së menduari (këto gjëra).”

Jahja ibn Bukejri na ka thënë: Na ka treguar Lejthiu, e këtij i ka treguar Ukajli, e ky nga Ibn Shihabi, e këtij i ka treguar Ibn Ebu Enesi, i çrobëruari i fisit tejmije, e këtij i ka treguar babai i tij se Ebu Hurejra (Allahu qoftë i kënaqur me të!) transmeton se i Dërguari i Allahut ﷺ ka thënë: “Kur të vijë Ramazani, hapen portat e Xhenetit, mbyllen dyert e Xhehenemit dhe prangosen shejtanët.”

Humejdiu na ka thënë: Na ka treguar Sufjani, e këtij i ka treguar Amri, e këtij i ka rrëfyer Seid ibn Xhubejri, e ky nga Ibn Abasi se Ubej ibn Kabi (Allahu qoftë i kënaqur me të!) tregon se e ka dëgjuar të Dërguarin e Allahut ﷺ duke thënë: “Musai i tha djaloshit (që e shoqëronte): “Na shtro për të ngrënë.” Ai ia ktheu: “Shiko! Kur ndaluam te shkëmbi, e harrova peshkun. Shejtani ishte ai që më bëri ta harroj.” Pra, Musai nuk ndjeu lodhje (dhe uri) derisa e kaloi vendin ku Allahu e kishte urdhëruar të ndalej.”

Abdullah ibn Mesleme na ka treguar nga Maliku, e ky nga Abdullah ibn Dinari se Abdullah ibn Omeri (Allahu qoftë i kënaqur me të!) tregon se e ka parë të Dërguarin e Allahut ﷺ të bëjë me dorë nga lindja (në drejtim të Irakut) dhe të thotë: “Atje është fitneja! Atje është fitneja, prej nga paraqitet briri i shejtanit.”

Jahja ibn Xhaferi na ka thënë: Na ka treguar Muhamed ibn Abdullah Ensariu, e këtij i ka treguar Ibn Xhurejxhi, e këtij i ka rrëfyer Atai se Xhabiri (Allahu qoftë i kënaqur me të!) transmeton se Pejgamberi ﷺ ka thënë: “Kur fillon të bjerë errësira e natës, mbani fëmijët tuaj brenda, sepse atëherë shpërndahen shejtanët. Pasi të kalojë një pjesë e mbrëmjes, lejoni të dalin. Po ashtu: mbyllni dyert duke thënë “bismilah”, fikni fanarët duke thënë “bismilah”, lidhni grykat e enëve të lëkurës duke thënë “bismilah”, mbuloni enët tuaja duke thënë “bismilah”, madje duke vendosur mbi to çfarëdo qoftë.”

Mahmud Gajlani më ka thënë: Na ka treguar Abdurrezaku, e këtij i ka rrëfyer Mameri, e ky nga Zuhriu, e ky nga Ali ibn Husejni se Safije bint Hujeji (Allahu qoftë i kënaqur me të!) tregon: “Teksa i Dërguari i Allahut ﷺ ishte në itikaf, shkova ta vizitoja gjatë natës. Bisedova pak me të, pastaj u ngrita për t'u kthyer, por ai u ngrit me mua për të më përcjellë, - ajo banonte në shtëpinë e Usame ibn Zejdit. - Aty pranë kaluan dy burra ensarë dhe, kur e panë Pejgamberin ﷺ, shpejtuan. Pejgamberi ﷺ u tha: “Mos u ngutni, kjo është Safije bint Hujeji.” Ata i thanë: “Subhanallah, o i Dërguari i Allahut!” Atëherë Pejgamberi ﷺ tha: “Shejtani qarkullon te njeriu siç qarkullon gjaku, andaj u frikësova mos po fut ndonjë të keqe, - ose ka thënë: diçka, - në zemrat tuaja.”

Abdani na ka thënë: Na ka treguar Ebu Hamzai, e ky nga Ameshi, e ky nga Adij ibn Thabiti se Sulejman ibn Suredi (Allahu qoftë i kënaqur me të!) tregon: “Teksa po qëndroja me Pejgamberin ﷺ, dy burra filluan të grindeshin mes vete. Njërit prej tyre iu skuq fytyra dhe iu frynë damarët (nga zemërimi). Pejgamberi ﷺ tha: “Unë di një fjalë, të cilën, nëse e thotë, do t'i kalojë ajo që e ka kapluar. Sikur të thotë: “Eudhu bilahi mine shejtani (Kërkoj mbrojtjen e Allahut kundrejt shejtanit)!”, do t'i kalojë kjo gjendje që e ka kapluar.” Andaj, personit në fjalë i thanë: “Pejgamberi ﷺ po thotë të kërkosh mbrojtjen e Allahut kundrejt shejtanit.” Ai tha: “Vallë, mos jam gjë i çmendur?”

Ademi na ka thënë: Na ka treguar Shuëbe, e këtij i ka treguar Mensuri, e ky nga Salim ibn Ebu Xhadi, e ky nga Kurejbi se Ibn Abasi (Allahu qoftë i kënaqur me të!) transmeton se Pejgamberi ﷺ ka thënë: “Kur dikush prej jush i afrohet bashkëshortes së vet (për marrëdhënie seksuale) dhe thotë: "Allahume xhenibni shejtane ve xhenibi shejtane ma razakteni (O Allah, largoje shejtanin prej meje dhe largoje prej pasardhësit tim)”, nëse u është caktuar të furnizohen me fëmijë, atëherë shejtani nuk do të mund ta dëmtojë e as ta pushtojë atë.”

Ameshi na ka treguar njëjtë nga Salimi, e ky nga Kurejbi, e ky nga Ibn Abasi.

Mahmudi na ka thënë: Na ka treguar Shebabi, e këtij i ka treguar Shuëbe, e ky nga Muhamed ibn Zijadi se Ebu Hurejra (Allahu qoftë i kënaqur me të!) tregon se Pejgamberi ﷺ u fal dhe tha: “Shejtani m'u paraqit dhe u përpoq të ma ndërpriste namazin, por Allahu ma mundësoi ta mbërtheja”, dhe vijoi pjesën tjetër të hadithit.

Muhamed ibn Jusufi na ka thënë: Na ka treguar Evzaiu, e ky nga Jahja ibn Ebu Kethiri, e ky nga Ebu Seleme se Ebu Hurejra (Allahu qoftë i kënaqur me të!) transmeton se Pejgamberi ﷺ ka thënë: “Kur të thirret ezani për namaz, shejtani largohet duke lëshuar gazra. Pasi të kryhet ezani, kthehet (dhe qëndron) derisa të thirret ikameti për namaz, e në atë rast ikën sërish. Pas ikametit, vjen sërish e hyn mes njeriut dhe zemrës së tij (i pëshpërit), duke i thënë: “Kujtoje këtë e atë!”, derisa ta bëjë njeriun të harrojë nëse i ka falur tri apo katër rekate. Andaj, nëse nuk di nëse i ka falur tri apo katër, në fund le t'i bëjë dy sexhde të harresës.”

Ebu Jemani na ka thënë: Na ka rrëfyer Shuajbi, e ky nga Ebu Zinadi, e ky nga Arexhi se Ebu Hurejra (Allahu qoftë i kënaqur me të!) transmeton se Pejgamberi ﷺ ka thënë: “Të gjithë bijtë e Ademit, kur lindin, shejtani i shpon anash me gishtin e tij, përveç Isait, të birit të Merjemes, të cilin shkoi për ta ngacmuar, por hasi në mbulesë (të foshnjës).”

Malik ibn Ismaili na ka thënë: Na ka treguar Israili, e ky nga Mugire, e ky nga Ibrahimi se Alkame tregon: “Shkova në Sham (dhe dikush erdhi e u ul afër meje). Më treguan se është Ebu Derdai (Allahu qoftë i kënaqur me të!), i cili më tha: “A është me ju personi të cilin Allahu e ka mbrojtur prej shejtanit, me gjuhën e të Dërguarit të Tij ﷺ?”

Sulejman ibn Harbi na ka thënë: “Na ka treguar Shuëbe nga Mugire se ka thënë: “Personi të cilin Allahu e ka mbrojtur prej shejtanit, me gjuhën e të Dërguarit të Tij ﷺ, është Amari.”

Lejthiu na ka thënë: Më ka treguar Halid ibn Jezidi, e ky nga Seid ibn Ebu Hilali, e ky nga Ebu Esvedi, e këtij i ka rrëfyer Urve se Aishja (Allahu qoftë i kënaqur me të!) transmeton se Pejgamberi ﷺ ka thënë: “Melekët mbi re bisedojnë rreth çështjeve (të paracaktuara qiellore) që do të ndodhin në Tokë, kurse shejtanët dëgjojnë ndonjë fjalë vjedhurazi dhe ua pëshpëritin falltarëve në veshë, si kur zbrazet diçka nga kavanozi, duke i shtuar edhe njëqind gënjeshtra (nga vetvetja).”

Asim ibn Aliu na ka thënë: Na ka treguar Ibn Ebu Dhiëbi, e ky nga Seid Makburi, e ky nga babai i tij se Ebu Hurejra (Allahu qoftë i kënaqur me të!) transmeton se Pejgamberi ﷺ ka thënë: “Gogësima është prej shejtanit. Andaj, kur dikujt prej jush i vjen gogësima, le të tentojë ta ndalë aq sa të mundet, se, kur dikush e hap gojën duke lëshuar zë “haah...” shejtani qesh me të.”

Zekerija ibn Jahjai na ka thënë: Na ka treguar Ebu Usame, e këtij i ka rrëfyer Hishami, e ky nga babai i tij se Aishja (Allahu qoftë i kënaqur me të!) tregon: “Ditën e Uhudit, kur idhujtarët u mposhtën, Iblisi kishte thirrur: “O robër të Allahut! Mbrapa jush!” Kështu, ata që ishin përpara, u kthyen mbrapa dhe u përballën me të fundit. Hudhejfe shikoi dhe e pa babanë e vet, Jemanin, dhe thirri: “O robër të Allahut, (ai është) babai im, babai im!” Por, ata nuk u ndalën derisa e vranë. Pastaj Hudhejfe tha: “Allahu ju faltë!”

Urve tregon: “Hudhejfe vazhdonte të bënte lutje dhe të kërkonte falje për atë që ia vrau babanë gabimisht, deri në vdekje.”

Hasen ibn Rabiu na ka thënë: Na ka treguar Ebu Ahvasi, e ky nga Eshathi, e ky nga babai i tij, e ky nga Mesruku se Aishja (Allahu qoftë i kënaqur me të!) tregon: “E pyeta Pejgamberin ﷺ në lidhje me shpërqendrimin e njeriut në namaz, e në atë rast më tha: “Ajo është gjë e grabitur, që shejtani e grabit prej namazit të ndokujt prej jush.”

Ebu Mugire na ka thënë: Na ka treguar Evzaiu, e këtij i ka treguar Jahjai, e ky nga Abdullah ibn Ebu Katade, e ky nga babai i tij, e ky nga Pejgamberi ﷺ. [t]: Sulejman ibn Abdurrahmani më ka thënë: Na ka treguar Velidi, e këtij i ka treguar Evzaiu, e këtij i ka treguar Jahja ibn Ebu Kethiri, e këtij i ka treguar Abdullah ibn Ebu Katade se Ebu Katadja (Allahu qoftë i kënaqur me të!) transmeton se Pejgamberi ﷺ ka thënë: “Ëndrrat e mira janë prej Allahut, ndërsa të këqijat janë prej shejtanit. Nëse dikush sheh një ëndërr të keqe, prej së cilës frikohet, le të pështyjë lehtë në të majtë dhe le të kërkojë mbrojtjen e Allahut prej dëmit të saj, se kështu ajo nuk e dëmton.”

Abdullah ibn Jusufi na ka thënë: Na ka rrëfyer Maliku, e ky nga Sumeji, i çrobëruari i Ebu Bekrit, e ky nga Ebu Salihu se Ebu Hurejra (Allahu qoftë i kënaqur me të!) transmeton se i Dërguari i Allahut ﷺ ka thënë: “Atij që thotë njëqind herë në ditë: “La ilahe il-lallahu vahdehu la sherike leh. Lehul mulku ve lehul hamdu, ve huve ala kuli shejin kadir (S'ka të adhuruar të denjë përveç Allahut, të Vetmit që nuk ka ortak. Atij i takon sundimi dhe lavdi, Ai ka fuqi për çdo gjë)”, i numërohen sikur t'i ketë liruar dhjetë robër, i shkruhen njëqind të mira e i fshihen njëqind mëkate dhe i bëhen strehim kundrejt shejtanit për tërë ditën deri në mbrëmje. Askush nuk ka vepruar diçka më me vlerë se kjo, përveç atij që punon (thotë) më shumë se kaq.”

Ali ibn Abdullahu na ka thënë: Na ka treguar Jakub ibn Ibrahimi, e këtij i ka treguar babai i tij, e ky nga Salihu, e ky nga Ibn Shihabi, e këtij i ka rrëfyer Abdulhamid ibn Abdurrahman ibn Zejdi, e këtij i ka treguar Muhamedi, i biri i Sad ibn Ebu Vekasit se babai i tij Sad ibn Ebu Vekasi (Allahu qoftë i kënaqur me të!) tregon: “Teksa disa gra ishin duke biseduar me të Dërguarin e Allahut ﷺ dhe po e tepronin duke i ngritur zërat, Omeri kërkoi leje për të hyrë. Me të dëgjuar Omerin, ato nxituan për të kaluar në pjesën pas perdes dhe Pejgamberi ﷺ, duke qeshur, i dha leje Omerit për të hyrë. Omeri i tha: “Allahu të bëftë gjithnjë të qeshur, o i Dërguari i Allahut!” Pejgamberi ﷺ i tha: “U habita me këto që janë të pranishme, kur dëgjuan zërin tënd, nxituan për të kaluar në pjesën pas perdes.” Omeri i tha: “Ama, ti, o i Dërguari i Allahut, je më meritor që të kenë frikërespekt ndaj teje!” Pastaj u ngrit dhe tha: “Oj armiket e vetvetes, po keni frikërespekt ndaj meje, ndërsa për të Dërguarin e Allahut ﷺ jo?!” Ato i thanë: “Po, sepse ti je më nevrik dhe më i vrazhdë se i Dërguari i Allahut.” Pejgamberi ﷺ tha: “Betohem në Atë, në Dorën e të Cilit është shpirti im se, sa herë që shejtani të has ty në ndonjë rrugë, detyrohet të ndjekë rrugë tjetër.”

Ibrahim ibn Hamzai më ka thënë: Më ka treguar Ibn Ebu Hazimi, e ky nga Jezidi, e ky nga Muhamed ibn Ibrahimi, e ky nga Isa ibn Talhai se Ebu Hurejra (Allahu qoftë i kënaqur me të!) transmeton se Pejgamberi ﷺ ka thënë: “Kur dikush zgjohet nga gjumi dhe merr abdes, le t'u fryjë hundëve tri herë, sepse shejtani bun në hundën e tij.”

Kutejbe transmeton nga Maliku, e ky nga Abdurrahman ibn Abdullah ibn Abdurrahman ibn Ebu Sasae Ensariu, e këtij i ka treguar babai i tij se Abdullah ibn Abdurrahman Ensariu tregon se Ebu Seid Hudriu (Allahu qoftë i kënaqur me të!) i ka thënë: “Kam vënë re se i pëlqen bagëtitë dhe fushat. Kur të jesh te bagëtitë ose nëpër fusha dhe e thërret ezanin, ngrije zërin, sepse nuk ndodh ta dëgjojë zërin e muezinit ndonjë xhin, njeri ose diçka tjetër, e të mos dëshmojë për ty Ditën e Kiametit.”

Pastaj, Ebu Seidi tha: “Këtë e kam dëgjuar prej të Dërguarit të Allahut ﷺ.”

Abdullah ibn Muhamedi na ka thënë: Na ka treguar Hisham ibn Jusufi, e këtij i ka treguar Mameri, e ky nga Zuhriu, e ky nga Salimi se Ibn Omeri (Allahu qoftë i kënaqur me të!) tregon se e ka dëgjuar Pejgamberin ﷺ, duke ligjëruar në minber, të ketë thënë: “Mbytni gjarpërinjtë! Mbyteni dyvijëshin dhe bishtshkurtrin, sepse ata mund të shkaktojnë verbëri dhe abortim!”

Abdullahu (Allahu qoftë i kënaqur me të!) tregon (duke vazhduar hadithin paraprak): “Një ditë, teksa po ndiqja një gjarpër për ta vrarë, Ebu Lubabe më thirri: “Mos e vrit!” I thashë: “I Dërguari i Allahut ﷺ ka urdhëruar vrasjen e gjarpërinjve.” Ai më tha: “Por, më pas, ai ka ndaluar vrasjen e gjarpërinjve të shtëpive.”
Zuhriu thotë: “Gjarpërinjtë e shtëpive janë xhinë që banojnë nëpër shtëpi.”

Abdurrezaku transmeton nga Mameri se Abdullah ibn Omeri (Allahu qoftë i kënaqur me të!) tregon se Ebu Lubabe dhe Zejd ibn Hatabi, të dy, e kanë parë (duke ndjekur gjarprin për ta vrarë).

Transmetimin e Abdurrezakut e ka fuqizuar Junusi, Ibn Ujejne, Is'hak Kelbiu dhe Zubejdi. Salihu, Ibn Ebu Hafsa dhe Ibn Muxhemiu kanë transmetuar nga Zuhriu, e ky nga Salimi, e ky nga Ibn Omeri se ka thënë: “Më kanë parë Ebu Lubabe dhe Zejd ibn Hatabi.”

Ismail ibn Ebu Uvejsi na ka thënë: Më ka treguar Maliku, e ky nga Abdurrahman ibn Abdullah ibn Ebu Sasae, e ky nga babai i tij se Ebu Seid Hudriu (Allahu qoftë i kënaqur me të!) transmeton se i Dërguari i Allahut ﷺ ka thënë: “Kam frikë se është afruar koha kur pasuria më e mirë për muslimanin do të jetë një kope dhensh, të cilat do t'i kullotë nëpër maja të maleve dhe në thellësi të luginave, që me fenë e tij të ikë nga sprovat.”

Abdullah ibn Jusufi na ka thënë: Na ka rrëfyer Maliku, e ky nga Ebu Zinadi, e ky nga Arexhi se Ebu Hurejra (Allahu qoftë i kënaqur me të!) transmeton se i Dërguari i Allahut ﷺ ka thënë: “Koka e mosbesimit është në lindje, mburrja dhe mendjemadhësia janë te pronarët e kuajve e deveve dhe te bujqit beduinë të shkretëtirës, ndërsa qetësia është te pronarët e deleve.”

Musededi na ka thënë: Na ka treguar Jahjai, e ky nga Ismaili, e këtij i ka treguar Kajsi se Ukbe ibn Amër Ebu Mesudi (Allahu qoftë i kënaqur me të!) tregon: “I Dërguari i Allahut ﷺ bëri me dorë nga Jemeni dhe tha: “Imani është jemenas, nga atje. Me të vërtetë, zemrat e ngurta dhe të vrazhda i gjen ndër blegtorët që mbajnë devetë prej bishti, aty ku paraqiten brirët e shejtanit, në fiset rebia dhe mudar.”

Kutejbe na ka thënë: Na ka treguar Lejthiu, e ky nga Xhafer ibn Rebia, e ky nga Arexhi se Ebu Hurejra (Allahu qoftë i kënaqur me të!) transmeton se Pejgamberi ﷺ ka thënë: “Kur të dëgjoni këndimin e gjelit, kërkoni nga Allahu mirësitë e Tij, sepse ai ka parë melek. Ndërkaq, kur të dëgjoni pëllitjen e gomarit, kërkoni mbrojtjen e Allahut kundrejt shejtanit, sepse ai ka parë shejtan.”

Is'haku na ka thënë: Na ka rrëfyer Revhu, e këtij i ka rrëfyer Ibn Xhurejxhi, e këtij i ka rrëfyer Atai se Xhabiri (Allahu qoftë i kënaqur me të!) transmeton se i Dërguari i Allahut ﷺ ka thënë: “Kur fillon të bjerë errësira e natës, - ose ka thënë: kur të vijë mbrëmja, - mbani fëmijët tuaj brenda, sepse atëherë shpërndahen shejtanët. Pasi të kalojë një pjesë e mbrëmjes, lejoni të dalin. Po ashtu, mbyllni dyert duke përmendur emrin e Allahut, sepse shejtani nuk mund të hapë derë të mbyllur.”

Imam Buhariu ka thënë: “Më ka rrëfyer Amër ibn Dinari se e ka dëgjuar Xhabir ibn Abdullahun, ngjashëm me atë që ma ka rrëfyer Atai, përpos që këtu nuk e ka përmendur: “Dhe përmendni emrin e Allahut!”

Musa ibn Ismaili na ka thënë: Na ka treguar Vuhejbi, e ky nga Halidi, e ky nga Muhamedi se Ebu Hurejra (Allahu qoftë i kënaqur me të!) transmeton se Pejgamberi ﷺ ka thënë: “Një grup benu israilësh pati humbur dhe nuk dihet çfarë ka ndodhur me ta. Unë mendoj se ata janë minjtë, sepse, kur ua ofron qumështin e deveve, nuk e pinë, e, kur ua ofron qumështin e deleve, e pinë.” Kur ia tregova këtë Kabit, më tha: “E ke dëgjuar Pejgamberin ﷺ ta thotë këtë?” I thashë: “Po.” Ai vazhdonte të më pyeste të njëjtën gjë disa herë, andaj i thashë: “Vallë, Tevratin e lexoj unë?”

Seid ibn Ufejri na ka thënë: Na ka treguar Ibn Vehbiu, e këtij i ka treguar Junusi, e ky nga Ibn Shihabi, e ky nga Urve se Aishja (Allahu qoftë i kënaqur me të!) transmeton se Pejgamberi ﷺ, në lidhje me zhapiun, ka thënë: “Dëmtues”, por nuk e kam dëgjuar të urdhërojë mbytjen e tij.

Sad ibn Ebu Vekasi pohon se Pejgamberi ﷺ ka urdhëruar mbytjen e zhapiut.

Sadaka na ka thënë: Na ka rrëfyer Ibn Ujejne, e këtij i ka treguar Abdulhamid ibn Xhubejr ibn Shejbe, e ky nga Seid ibn Musejebi se Umu Sheriku (Allahu qoftë i kënaqur me të!) tregon se është urdhëruar nga Pejgamberi ﷺ që të mbysë zhapiun.

Ubejd ibn Ismaili na ka thënë: Na ka treguar Ebu Usame, e ky nga Hishami, e ky nga babai i tij se Aishja (Allahu qoftë i kënaqur me të!) transmeton se Pejgamberi ﷺ ka thënë: “Mbyteni gjarprin dyvijësh, sepse ai mund të shkaktojë verbërinë dhe abortimin.”

Transmetimin e Ubejd ibn Ismailit e fuqizon Hamad ibn Seleme Ebu Usame.

Musededi na ka thënë: Na ka treguar Jahjai, e ky nga Hishami, e këtij i ka treguar babai i tij se Aishja (Allahu qoftë i kënaqur me të!) transmeton se Pejgamberi ﷺ ka urdhëruar mbytjen e gjarprit bishtshkurtër dhe ka thënë: “Ai mund të shkaktojë verbërinë dhe abortimin.”

Amër ibn Aliu më ka thënë: Na ka treguar Ibn Ebu Adiu, e ky nga Ebu Junus Kushejriu se Ibn Ebu Mulejke tregon se Ibn Omeri (Allahu qoftë i kënaqur me të!) i mbyste gjarpërinjtë, por pastaj u ndal. Ai (Ibn Omeri) tregon se Pejgamberi ﷺ rrënoi një mur, nën të cilin gjeti një lëkurë gjarpri dhe tha: “Gjejeni ku është!” dhe, kur e gjetën, tha: “Mbyteni.” Për këtë arsye, i mbysja gjarpërinjtë.

Ibn Omeri tregon: “Kur e takova Ebu Lubaben (Allahu qoftë i kënaqur me të!), më tregoi se Pejgamberi ﷺ ka thënë: “Mos i mbytni gjarpërinjtë e shtëpive, përveç bishtshkurtrin dyvijësh, se ai mund të shkaktojë abortin dhe verbërinë, andaj mbyteni atë.”

Malik ibn Ismaili na ka thënë: Na ka treguar Xherir ibn Hazimi se Nafiu tregon se Ibn Omeri (Allahu qoftë i kënaqur me të!) i mbyste gjarpërinjtë.

Ibn Omeri ka thënë se Ebu Lubabe (Allahu qoftë i kënaqur me të!) i ka treguar se Pejgamberi ﷺ ka ndaluar mbytjen e gjarpërinjve të shtëpisë. Së këndejmi, Ibn Omeri ndaloi së mbyturi ata.

Musededi na ka thënë: Na ka treguar Jezid ibn Zureji, e këtij i ka treguar Mameri, e ky nga Zuhriu, e ky nga Urve se Aishja (Allahu qoftë i kënaqur me të!) transmeton se i Dërguari i Allahut ﷺ ka thënë: “Pesë lloje kafshësh janë të dëmshme, andaj vriten edhe në Harem:

1. Miu,

2. Akrepi,

3. Qifti,

4. Korbi, dhe

5. Qeni sulmues.”

Abdullah ibn Mesleme na ka thënë: Na ka rrëfyer Maliku, e ky nga Abdullah ibn Dinari se Abdullah ibn Omeri (Allahu qoftë i kënaqur me ta!) transmeton se i Dërguari i Allahut ﷺ ka thënë: “Muhrimi nuk ka mëkat nëse mbyt pesë lloje të kafshëve:

1. Akrepin,

2. Miun,

3. Qenin sulmues,

4. Korbin, dhe

5. Qiftin.”

Musededi na ka thënë: Na ka treguar Hamad ibn Zejdi, e ky nga Kethiri, e ky nga Atai se Xhabiri (Allahu qoftë i kënaqur me të!) transmeton se Pejgamberi ﷺ ka thënë: “Mbuloni enët, lidhni grykat e enëve të lëkurës, mbyllni dyert dhe mbani fëmijët brenda në mbrëmje, sepse atëherë xhinët shpërndahen dhe rrëmbejnë gjëra. Fikni fanarët kur të shtriheni (për të fjetur), sepse miu mund ta tërheqë fitilin dhe t'i djegin banorët e shtëpisë.”

Ibn Xhurejxhi dhe Habibi transmetojnë nga Atai se (Pejgamberi ﷺ) ka thënë: “... sepse atëherë shejtanët.”

Abde ibn Abdullahu na ka thënë: Na ka rrëfyer Jahja ibn Ademi, e ky nga Israili, e ky nga Mensuri, e ky nga Ibrahimi, e ky nga Alkame se Abdullahu (Allahu qoftë i kënaqur me të!) tregon: “Teksa ishim me të Dërguarin e Allahut ﷺ në një shpellë (në Mina), iu shpall surja Murselat. Ne e mësonim atë nga goja e tij. Papritmas, na doli një gjarpër nga një vrimë. Ne iu vërsulëm për ta mbytur, por ai na iku dhe u fut sërish në vrimë. Atëherë i Dërguari i Allahut ﷺ tha: “I shpëtoi së keqes suaj ashtu siç i shpëtuat ju së keqes së tij.”

Njëjtë është transmetuar edhe nga Israili, e ky nga Ameshi, e ky nga Ibrahimi, e ky nga Alkame, e ky nga Abdullahu, i cili ka thënë: “Ne e mësonim atë nga goja e tij, të freskët. (Këtë transmetim nga) Mensuri e fuqizon Ebu Avane nga Mugire. Ndërkaq, Hafsi, Ebu Muaviu dhe Sulejman ibn Karmi e transmetojnë nga Ameshi, e ky nga Ibrahimi, e ky nga Esvedi, e ky nga Abdullahu.”

Nasr ibn Aliu na ka thënë: Na ka rrëfyer Abdulalai, e këtij i ka treguar Ubejdullah ibn Omeri, e ky nga Nafiu se Ibn Omeri (Allahu qoftë i kënaqur me të!) transmeton se Pejgamberi ﷺ ka thënë: “Një grua hyri në Zjarr për shkak se e mbajti një mace lidhur: as e ushqeu, as e lëshoi të ushqehej vetë me gjallesa të tokës.”

Imam Buhariu ka thënë: “Ubejdullahu na ka treguar të njëjtën nga Seid Makburiu, e ky nga Ebu Hurejra.”

Ismail ibn Ebu Uvejsi na ka thënë: Më ka treguar Maliku, e ky nga Ebu Zinadi, e ky nga Arexhi se Ebu Hurejra (Allahu qoftë i kënaqur me të!) transmeton se i Dërguari i Allahut ﷺ ka treguar: “Një pejgamber u ndal të pushojë nën një pemë, ku një milingonë e pickoi. Kështu, ai urdhëroi që të largohen plaçkat nga hija e pemës, dhe të digjet tërë vendbanimi i tyre. Atëherë, Allahu i shpalli duke i thënë: “Sikur ta mbysje vetëm njërën?!”

Halid ibn Mahledi na ka thënë: Na ka treguar Sulejman ibn Bilali, e këtij i ka treguar Utbe ibn Muslimi, e këtij i ka rrëfyer Ubejd ibn Hunejni se Ebu Hurejra (Allahu qoftë i kënaqur me të!) transmeton se Pejgamberi ﷺ ka thënë: “Kur në enën e ndokujt bie miza, atëherë le ta zhytë tërësisht, pastaj le ta nxjerrë. Kjo, se në njërin krah të saj ka sëmundje, kurse në tjetrin shërimin (e asaj sëmundjeje).”

Hasen ibn Sabahu na ka thënë: Na ka treguar Is'hak Ezraku, e këtij i ka treguar Aufi, e ky nga Haseni, e ky nga Ibn Sirini se Ebu Hurejra (Allahu qoftë i kënaqur me të!) transmeton se i Dërguari i Allahut ﷺ ka thënë: “I janë falur mëkatet një gruaje zinaqare, e cila, me të kaluar pranë një qeni që po dihaste, - që veç sa s'po ngordhte nga etja, - në afërsi të një pusi, e zbathi këpucën, e lidhi me pelerinën e saj dhe nxori ujë për qenin. Kështu, Allahu ia fali mëkatet.”

Ali ibn Abdullahu na ka thënë: Na ka treguar Sufjani, e ky e ka mbajtur në mend nga Zuhriu. Kështu na ka rrëfyer edhe Ubejdullahu nga Ibn Abasi se Ebu Talhai (Allahu qoftë i kënaqur me të!) transmeton se Pejgamberi ﷺ ka thënë: “Melekët nuk hyjnë në atë shtëpi që ka qen ose piktura (frymorësh).”

Abdullah ibn Jusufi na ka thënë: Na ka rrëfyer Maliku, e ky nga Nafiu se Abdullah ibn Omeri (Allahu qoftë i kënaqur me të!) tregon se i Dërguari i Allahut ﷺ ka urdhëruar mbytjen e qenve.

Musa ibn Ismaili na ka thënë: Na ka treguar Hemami, e ky nga Jahjai, e këtij i ka treguar Ebu Seleme se Ebu Hurejra (Allahu qoftë i kënaqur me të!) transmeton se i Dërguari i Allahut ﷺ ka thënë: “Atij që mban qen, shpërblimi i veprave i mbetet mangët çdo ditë nga një kirat, përveç qenit për bujqësi ose bagëti.”

Abdullah ibn Mesleme na ka thënë: Na ka treguar Sulejmani, e këtij i ka rrëfyer Jezid ibn Husajfe, e këtij i ka rrëfyer Saib ibn Jezidi se Sufjan ibn Ebu Zuhejr Sheneviu (Allahu qoftë i kënaqur me të!) tregon se e ka dëgjuar të Dërguarin e Allahut ﷺ duke thënë: “Atij që mban qen, që nuk i hyn në punë as për bujqësi e as për bagëti, shpërblimi i veprave i mbetet mangët çdo ditë nga një kirat.”

Saib ibn Jezidi e ka pyetur Sufjanin:

- Vallë, vetë ti e ke dëgjuar këtë prej të Dërguarit të Allahut ﷺ?

- Po, betohem në Zotin e kësaj xhamie, - ia ktheu Sufjani.