Sahihu i Buhariut — Hadithi 859
161. Nënkapitulli: Abdesi i fëmijëve dhe koha kur u obligohet gusli e pastrimi, prezantimi i tyre në namazin me xhemat, bajrame, namazin e xhenazes, si dhe rreshtimi i tyre nëpër safa
859. Nga: Abdullah ibn Abasi
Ali ibn Abdullahu na ka thënë: Na ka rrëfyer Sufjani, e ky nga Amri, e këtij i ka rrëfyer Kurejbi se Ibn Abasi (Allahu qoftë i kënaqur me të!) tregon: “Një natë bujta në shtëpinë e tezes sime, Mejmunes. Pejgamberi ﷺ ra në gjumë dhe gjatë natës u zgjua, mori shpejt abdes nga një shakull i varur e pastaj u ngrit për t'u falur. Edhe unë u ngrita dhe mora abdes njëjtë dhe iu bashkëngjita për t'u falur në të majtë të tij, por ai më zhvendosi në anën e djathtë. U fal aq sa ia mundësoi Allahu, pastaj ra për të fjetur, saqë ia dëgjova gërhitjen. Kur i erdhi muezini dhe e thirri për namaz, shkoi me të për në namaz, pa e ripërtërirë abdesin.”
I thamë Amrit: “Disa po thonë se Pejgamberit ﷺ i fle vetëm syri, e jo edhe zemra.”
Amri tha: “E kam dëgjuar Ubejd ibn Umejrin duke thënë: “Ëndrrat e pejgamberëve janë shpallje, pastaj e lexoi: “... kam parë në ëndërr se duhet të të ther...” (Safat, 102)