92. Sprovat

Ali ibn Abdullahu na ka thënë: Na ka treguar Bishr ibn Seriu, e këtij i ka treguar Nafi ibn Omeri, e ky nga Ibn Ebu Mulejke se Esma (Allahu qoftë i kënaqur me ta!) transmeton se Pejgamberi ﷺ ka thënë: “Unë do të jem te Hauzi, duke pritur kush po vjen tek unë, por disa persona do të pengohen, ndërsa unë do të them: “Ata janë të umetit tim!” Atëherë më thuhet: “Ti nuk e di. Ata janë kthyer në besimin e mëhershëm (janë bërë renegatë).”
Ibn Ebu Mulejke thoshte: “O Allah, kërkojmë mbrojtjen Tënde nga kthimi në besimin e mëparshëm ose sprovimi në fenë tonë!”

Musa ibn Ismaili na ka thënë: Na ka treguar Ebu Avane, e ky nga Mugire, e ky nga Ebu Vaili se Abdullahu (Allahu qoftë i kënaqur me të!) transmeton se Pejgamberi ﷺ ka thënë: “Unë do t'ju pres te Hauzi. Aty do të më sillen disa burra nga mesi juaj, të cilët, kur tentoj t'u jap (ujë), më rrëmbehen para sysh. Unë do të them: “O Zoti im, shokët e mi?!”
- Ti nuk e di çfarë kanë shpikur pas teje, - më thotë.”

7050. 7051. Jahja ibn Bukejri na ka thënë: Na ka treguar Jakub ibn Abdurrahmani, e ky nga Ebu Hazimi se Sehël ibn Sadi (Allahu qoftë i kënaqur me të!) tregon: “E kam dëgjuar Pejgamberin ﷺ duke thënë: “Unë do t'ju pres te Hauzi. Kush arrin deri aty, do të pijë prej tij, e, kush pi, kurrë më nuk do të ndiejë etje. Disa njerëz, të cilët i njoh dhe më njohin, do të arrijnë tek unë, por më pas do të ketë pengesë mes meje dhe tyre.”
Ebu Hazimi ka thënë: “E kam marrë prej Numan ibn Ebu Ajashit përmes dëgjimit, ndërkohë po ua tregoja këtë, e ai më tha: “E kështu e ke dëgjuar Sehlin?” I thashë: “Po.” Më tha: “Atëherë unë dëshmoj se e kam dëgjuar Ebu Seid Hudriun duke shtuar në lidhje me këtë se Pejgamberi ﷺ ka thënë: “... (Unë do të them:) Ata janë me mua!” Por do të më thuhet: “Ti nuk e di çfarë kanë ndryshuar pas teje.” Atëherë unë do të them: “Larg! Larg me ata që kanë ndryshuar pas meje!”

7050. 7051.

Musededi na ka thënë: Na ka treguar Jahja ibn Seid Katani, e këtij i ka treguar Ameshi, e këtij i ka treguar Zejd ibn Vehbiu se Abdullahu (Allahu qoftë i kënaqur me të!) tregon: “I Dërguari i Allahut ﷺ na ka thënë: “Pas meje do të përballeni me anashkalim të të drejtave tuaja (nga prijësit) dhe do të shihni gjëra që nuk do t'ju pëlqejnë.” Të pranishmit pyetën: “Atëherë, çfarë po na porosit, o i Dërguari i Allahut?” Ai tha: “T'i kryeni detyrat ndaj tyre (udhëheqësve) dhe t'i kërkoni Allahut hakun tuaj.”

Musededi transmeton nga Abdulvarithi, e ky nga Xhadi, e ky nga Ebu Rexhai se Ibn Abasi (Allahu qoftë i kënaqur me të!) transmeton se Pejgamberi ﷺ ka thënë: “Ai që urren diçka te prijësi i tij, le të durojë, sepse, ai që rebelohet ndaj prijësit të vet, qoftë sa një pëllëmbë, do të vdesë sikurse në periudhën paraislame.”

Ebu Numani na ka thënë: Na ka treguar Hamad ibn Zejdi, e ky nga Xhad Ebu Othmani, e këtij i ka treguar Ebu Rexha Utaridiu se Ibn Abasi (Allahu qoftë i kënaqur me të!) transmeton se Pejgamberi ﷺ ka thënë: “Ai që te prijësi i vet vëren diçka që e urren, le të durojë, sepse, ai që largohet prej xhematit, qoftë sa një pëllëmbë dhe vdes, atëherë vdes sikurse në periudhën paraislame.”

Ismaili na ka thënë: Më ka treguar Ibn Vehbiu, e ky nga Amri, e ky nga Bukejri, e ky nga Busr ibn Seidi se Xhunade ibn Ebu Umeje tregon: “Shkuam tek Ubade ibn Samiti teksa ishte i sëmurë dhe i thamë: “Allahu të përmirësoftë! Na trego një hadith, që Allahu të të bëjë dobi me të, të cilin e ke dëgjuar prej Pejgamberit ﷺ.” Ai tha: “Pejgamberi ﷺ na thirri dhe ne ia dhamë besën.”

Në vazhdim të hadithit paraprak, Ubade ibn Samiti (Allahu qoftë i kënaqur me të!) tregon: “Ndër gjërat për të cilat ia dhamë besën ishin se, do të dëgjojmë dhe do të bindemi, na pëlqeu apo s'na pëlqeu, në vështirësi apo në lehtësi, madje, edhe nëse prijësi i jep dikujt tjetër përparësi ndaj së drejtës sonë; si dhe të mos ua cenojmë postin atyre që e kanë: “... përveç nëse shihni mosbesim të qartë, për të cilin keni argument të qartë prej Allahut.”

Muhamed ibn Arare na ka thënë: Na ka treguar Shuëbe, e ky nga Katadja, e ky nga Enes ibn Maliku se Usejd ibn Hudajri (Allahu qoftë i kënaqur me të!) tregon se një njeri shkoi te Pejgamberi ﷺ dhe i tha: “O i Dërguari i Allahut, ti e caktove filanin (në një detyrë), kurse mua jo!”
- “Pas vdekjes sime do të përballeni me anashkalim të të drejtave tuaja (nga prijësit), andaj duroni, derisa të më takoni”, - i tha Pejgamberi ﷺ.”

Musa ibn Ismaili transmeton se Amër ibn Jahjai tregon: “Gjyshi im (Seid ibn Amër ibn Seidi) më ka rrëfyer: “Po rrija me Ebu Hurejrën (Allahu qoftë i kënaqur me të!) në Xhaminë e Pejgamberit ﷺ në Medinë, e, me ne ishte edhe Mervani, ndërkohë Ebu Hurejra tha: “E kam dëgjuar të sinqertin që i është thënë e vërteta (Pejgamberin ﷺ) të thotë: “Shkatërrimi i umetit tim do të jetë në duart e disa djelmoshave kurejshë.” Mervani tha: “Allahu i mallkoftë ata djelmosha!”

Ebu Hurejra vazhdoi: “Po të doja, do t'i përmendja edhe me emra: benu filanët dhe benu filanët.”
Amër ibn Jahjai thoshte: “Unë dilja me gjyshin tim ndër benu mervanët, që ishin udhëheqës në Sham, për të cilët, kur ai i shihte djelmosha të rinj, na thoshte: “Ndoshta këta janë prej tyre?”

- Ti e di më mirë, - i thoshim ne.”

Malik ibn Ismaili na ka thënë: Na ka treguar Ibn Ujejne, e ky e ka dëgjuar Zuhriun, e ky nga Urve, e ky nga Zejnebe bint Umu Seleme, e ky nga Umu Habibe se Zejnebe bint Xhahshi (Allahu qoftë i kënaqur me të!) tregon se Pejgamberi ﷺ u zgjua nga gjumi, ndërsa fytyra i ishte skuqur dhe tha: “La ilahe il-lallah! Mjerë arabët nga sherri që u është afruar! Sot është hapur një pjesë e pendës së jexhuxhëve dhe mexhuxhëve, sa kjo”, - dhe e përtheu gishtin e madh me treguesin duke formuar një unazë. Dikush e pyeti: “Vallë, a do të shkatërrohemi, ndërkohë në mesin tonë ka njerëz të mirë?”
- “Po, nëse përhapet e keqja (paturpësitë)”, - iu përgjigj ai.

Ebu Nuajmi na ka thënë: Na ka treguar Ibn Ujejne, e ky nga Zuhriu. [t]: Mahmudi më ka thënë: Na ka rrëfyer Abdurrezaku, e këtij i ka rrëfyer Mameri, e ky nga Zuhriu, e ky nga Urve se Usame ibn Zejdi (Allahu qoftë i kënaqur me të!) tregon: “Pejgamberi ﷺ hipi në një kullë të Medinës dhe tha: “Vallë, a po e shihni atë që po shoh unë?”
- Jo, - i thanë ata.
- “Po i shoh sprovat duke rënë nëpër shtëpitë tuaja siç bien pikat e shiut”, - tha Pejgamberi ﷺ.”

Ajash ibn Velidi na ka thënë: Na ka rrëfyer Abdulala, e këtij i ka treguar Mameri, e ky nga Zuhriu, e ky nga Seidi se Ebu Hurejra (Allahu qoftë i kënaqur me të!) transmeton se Pejgamberi ﷺ ka thënë: “Koha do të shkurtohet, do të pakësohen veprat, do të pllakosë koprracia, do të shfaqen fitnet dhe do të shpeshtohet herxhi.”
- O i Dërguari i Allahut, ç'është ai (herxhi)? - e pyetën.
- “Vrasja. Vrasja”, - tha Pejgamberi ﷺ.

Këtë e transmetojnë edhe Shuajbi, Junusi, Lejthiu dhe i biri i vëllait të Zuhriut, nga Zuhriu, e ky nga Humejdi, e ky nga Ebu Hurejra, e ky nga Pejgamberi ﷺ.

7062. 7063. Musededi na ka thënë: Na ka treguar Ubejdullah ibn Musai, e ky nga Ameshi se Shekiku tregon: “Isha me Abdullahun dhe Ebu Musain (Allahu qoftë i kënaqur me ta!), të cilët transmetuan se Pejgamberi ﷺ ka thënë: “Para Kiametit do të vijë një kohë kur do të përhapet injoranca, do të pakësohet dituria dhe do të shpeshtohet herxhi.” Herxhi është vrasja.

7062. 7063

Omer ibn Hafsi na ka thënë: Na ka treguar babai im, e këtij i ka treguar Ameshi, e këtij i ka treguar Shekiku se Abdullahu dhe Ebu Musai u ulën dhe na treguan se Ebu Musai (Allahu qoftë i kënaqur me të!) transmeton se Pejgamberi ﷺ ka thënë: “Para Kiametit do të vijë një kohë kur do të pakësohet dituria, do të përhapet injoranca dhe do të shpeshtohet herxhi.” Herxhi është vrasja.

Kutejbe na ka thënë: Na ka treguar Xheriri, e ky nga Ameshi, e ky nga Ebu Vaili, i cili thotë: Teksa isha duke ndenjur me Abdullahun dhe Ebu Musain, Ebu Musai (Allahu qoftë i kënaqur me të!) na tregoi: “E kam dëgjuar Pejgamberin ﷺ; sikurse hadithi paraprak.”
Herxh në gjuhën etiopase do të thotë vrasje.

Muhamedi na ka thënë: Na ka treguar Gunderi, e këtij i ka treguar Shuëbe, e ky nga Vasili, e ky nga Ebu Vaili se Abdullahu (Allahu qoftë i kënaqur me të!) transmeton se Pejgamberi ﷺ ka thënë: “Para Kiametit do të vijnë ditë të herxhit, do të pakësohet dituria dhe do të përhapet injoranca.”
Ebu Musai tha: “Herxh në gjuhën etiopase do të thotë vrasje.”

Ebu Avane transmeton nga Asimi, e ky nga Ebu Vaili se Ebu Musai tregon se i ka thënë Abdullah ibn Mesudit (Allahu qoftë i kënaqur me ta!): “Vallë, e di për çfarë kohe Pejgamberi ﷺ ka thënë se janë ditët e herxhit (vrasjeve)?” Ibn Mesudi u përgjigj: “E kam dëgjuar Pejgamberin ﷺ duke thënë: “Njerëzit më të këqij janë ata që Kiameti do t'i gjejë gjallë.”

Muhamed ibn Jusufi na ka thënë: Na ka treguar Sufjani se Zubejr ibn Adiu tregon: “Shkuam tek Enes ibn Maliku (Allahu qoftë i kënaqur me të!) dhe iu ankuam për mundimet që përjetonim nga Haxhaxhi. Ai na tha: “Duroni, se çdo kohë që vjen do të jetë më e keqe se ajo paraprake, derisa ta takoni Zotin tuaj.” Këtë e kam dëgjuar nga Pejgamberi juaj ﷺ.”

Ebu Jemani na ka thënë: Na ka rrëfyer Shuajbi, e ky nga Zuhriu. [t]: Ismaili na ka thënë: Më ka treguar vëllai im nga Sulejmani, e ky nga Muhamed ibn Ebu Atiku, e ky nga Ibn Shihabi, e ky nga Hind bint Harith Firasije se Umu Seleme (Allahu qoftë i kënaqur me të!), gruaja e Pejgamberit ﷺ, ka thënë: “Një natë, i Dërguari i Allahut ﷺ u zgjua i trembur dhe tha: “Subhanallah (i Lartësuar qoftë Allahu)! Sa thesare janë hapur sonte e sa sprova kanë zbritur! Kush i zgjon zonjat e shtëpive që të falen? - aludonte në gratë e tij. Ku i dihet: një e veshur në dynja mund të jetë e zhveshur në botën tjetër!”

Abdullah ibn Jusufi na ka thënë: Na ka rrëfyer Maliku, e ky nga Nafiu se Abdullah ibn Omeri (Allahu qoftë i kënaqur me ta!) transmeton se i Dërguari i Allahut ﷺ ka thënë: “Ai që i ngre armët kundër nesh, nuk është prej nesh.”

Muhamed ibn Alai na ka thënë: Na ka treguar Ebu Usame, e ky nga Burejdi, e ky nga Ebu Burde se Ebu Musai (Allahu qoftë i kënaqur me të!) transmeton se Pejgamberi ﷺ ka thënë: “Ai që ngre armët kundër nesh, nuk është prej nesh.”

Muhamedi na ka thënë: Na ka rrëfyer Abdurrezaku, e ky nga Mameri, e ky nga Hemami se Ebu Hurejra (Allahu qoftë i kënaqur me të!) transmeton se Pejgamberi ﷺ ka thënë: “Askush të mos ia drejtojë armën vëllait të vet, sepse nuk i dihet, ndoshta shejtani ia tërheq dorën e tij dhe kjo bëhet shkak që ai të bjerë në gropë të Zjarrit.”

Ali ibn Abdullahu transmeton se Sufjani tregon: “E pyeta Amrin: “O Ebu Muhamed, a e ke dëgjuar Xhabir ibn Abdullahun (Allahu qoftë i kënaqur me ta!) duke treguar se si një person që mbante shtiza kaloi nëpër xhami, e në atë rast i Dërguari i Allahut ﷺ i tha: “Mbërtheji majat e tyre (që të mos lëndojnë ndokënd)!” Amër ibn Dinari tha: “Po.”

Ebu Numani na ka thënë: Na ka treguar Hamad ibn Zejdi, e ky nga Amër ibn Dinari se Xhabiri (Allahu qoftë i kënaqur me ta!) tregon: “Teksa një person po kalonte nëpër xhami me majat e shtizave të ekspozuara, u urdhërua t'i mbërthente majat e tyre me dorë, për të mos gërvishtur ndonjë musliman.”

Muhamed ibn Alai na ka thënë: Na ka treguar Ebu Usame, e ky nga Burejdi, e ky nga Ebu Burde se Ebu Musai (Allahu qoftë i kënaqur me të!) transmeton se Pejgamberi ﷺ ka thënë: “Nëse ndokush kalon nëpër xhamitë ose tregjet tona duke bartur ndonjë shigjetë, le t'ia kapë majën”, - ose ka thënë: “... le ta kapë majën me dorë, - që të mos therë ndonjë musliman me të.”

Omer ibn Hafsi na ka thënë: Më ka treguar babai im, e këtij i ka treguar Ameshi, e këtij i ka treguar Shekiku se Abdullahu (Allahu qoftë i kënaqur me të!) transmeton se Pejgamberi ﷺ ka thënë: “Fyerja e muslimanit është mëkat, kurse luftimi i tij është kufër.”

Haxhaxh ibn Minhali na ka thënë: Na ka treguar Shuëbe, e këtij i ka rrëfyer Vakidi, e ky nga babai i tij se Ibn Omeri (Allahu qoftë i kënaqur me ta!) transmeton se Pejgamberi ﷺ ka thënë: “Mos u ktheni pas meje në jobesimtarë e ta vrisni njëri-tjetrin.”

Musededi na ka thënë: Na ka treguar Jahjai, e këtij i ka treguar Kurra ibn Halidi, e këtij i ka treguar Ibn Sirini, e ky nga Abdurrahman ibn Ebu Bekrete, e ky nga Ebu Bekrete dhe një person tjetër, i cili në vetvete është më i mirë se Abdurrahman ibn Ebu Bekrete, se Ebu Bekrete (Allahu qoftë i kënaqur me të!) tregon: “Një ditë, i Dërguari i Allahut ﷺ na ligjëroi dhe tha:
- “Vallë, e dini çfarë dite është sot?”
- Allahu dhe i Dërguari i Tij e dinë më së miri, - thanë të pranishmit.
Pastaj heshti, saqë menduam se do ta emërtojë me ndonjë emër tjetër, por tha:
- “A nuk është dita e Bajramit?”
- Po, ashtu është, o i Dërguari i Allahut!
- “Cili qytet është ky? A nuk është qyteti i shenjtë?”
- Po, ashtu është, o i Dërguari i Allahut!
- “Dijeni mirë se gjaqet, pasuria, nderi dhe lëkurat tuaja janë të shenjtë sikurse shenjtëria e kësaj dite, në këtë muaj, në këtë vend. A e kumtova, vallë?”
- Po, - iu përgjigjën.
- “Zoti im, ji Dëshmitar! Të pranishmit le t'ua përcjellin atyre që mungojnë, se ndoshta ai të cilit do t'i kumtohet e kupton më mirë se këta që po e dëgjojnë.”
(Muhamed ibn Sirini shton:) “Me të vërtetë, ashtu ka ndodhur.”
Pastaj Pejgamberi ﷺ tha: “Pas meje (pas vdekjes sime) mos u ktheni në kufër e të vrisni njëri-tjetrin.”
Ditën kur Xharije ibn Kudame e dogji Ibn Hadremiun, pati thënë: “Gjejeni Ebu Bekreten.”

- Ja ku është Ebu Bekrete, po të sheh, - i thanë.

Abdurrahmani ka thënë: “Nëna ime më ka treguar se Ebu Bekrete ka thënë: “Sikur të vinin tek unë, nuk do t'i luftoja, qoftë dhe për një shtizë.”

Ahmed ibn Ishkabi na ka thënë: Na ka treguar Muhamed ibn Fudajli, e ky nga babai i tij, e ky nga Ikrime se Ibn Abasi (Allahu qoftë i kënaqur me të!) transmeton se Pejgamberi ﷺ ka thënë: “Mos u ktheni pas meje në kufër (mosbesim) e ta vrisni njëri-tjetrin.”

Sulejman ibn Harbi na ka thënë: Na ka treguar Shuëbe, e ky nga Ali ibn Mudriku, e ky e ka dëgjuar Ebu Zura ibn Amër ibn Xheririn se gjyshi i tij Xheriri (Allahu qoftë i kënaqur me të!) tregon: “I Dërguari i Allahut ﷺ, në Haxhin Lamtumirës, më ka thënë: “Urdhëroji njerëzit të dëgjojnë!” Pastaj tha: “Mos u ktheni pas meje në kufër (mosbesim) e ta luftoni njëri-tjetrin.”

Muhamed ibn Ubejdullahu na ka thënë: Na ka treguar Ibrahim ibn Sadi, e ky nga babai i tij, e ky nga Ebu Seleme ibn Abdurrahmani, e ky nga Ebu Hurejra; [t]: Ibrahimi na ka thënë: Më ka treguar Salih ibn Kejsani, e ky nga Ibn Shihabi, e ky nga Seid ibn Musejebi se Ebu Hurejra (Allahu qoftë i kënaqur me të!) transmeton se i Dërguari i Allahut ﷺ ka thënë: “Do të ketë trazira, ku ai që qëndron ulur, do të jetë më i mirë se ai që qëndron në këmbë; ai që qëndron në këmbë do të jetë më i mirë se ai që ecën, e ai që ecën do të jetë më i mirë se ai që vrapon. Kush u ekspozohet (trazirave), do të shkatërrohet. Prandaj, ai që gjen vendstrehim ose vendmbrojtje, le të strehohet.”

Ebu Jemani na ka thënë: Na ka rrëfyer Shuajbi, e ky nga Zuhriu, e këtij i ka rrëfyer Ebu Seleme ibn Abdurrahmani se Ebu Hurejra (Allahu qoftë i kënaqur me të!) transmeton se i Dërguari i Allahut ﷺ ka thënë: “Do të ketë trazira, ku ai që qëndron ulur, do të jetë më i mirë se ai që qëndron në këmbë; ai që qëndron në këmbë do të jetë më i mirë se ai që ecën, e ai që ecën do të jetë më i mirë se ai që vrapon. Kush u ekspozohet (trazirave), do të shkatërrohet. Prandaj, ai që gjen vendstrehim ose vendmbrojtje, le të strehohet.”

Abdullah ibn Abdulvehabi na ka thënë: Na ka treguar Hamadi nga një person, të cilin nuk e ka përmendur me emër, e ky nga Haseni se Ahnef ibn Kajsi rrëfen: “Ditëve të fitnes (Luftës në Sifin) dola i armatosur dhe e takova Ebu Bekreten (Allahu qoftë i kënaqur me të!), i cili më pyeti: “Ku po shkon?” I thashë: “Ta ndihmoj djalin e axhës së të Dërguarit të Allahut ﷺ.” Ai ma ktheu: “I Dërguari i Allahut ﷺ ka thënë: “Kur dy muslimanë ndeshen me shpatat e tyre, që të dy do të jenë banorë të Zjarrit.” Ndërkohë dikush pati pyetur: “Për vrasësin po kuptohet, po ç'është puna e të vrarit?” Pejgamberi ﷺ tha: “Edhe ai donte ta vriste vëllanë e vet.”

Hamad ibn Zejdi ka thënë: “Këtë hadith ia përmenda Ejubit dhe Junus ibn Ubejdit, duke pasur për qëllim që ata të ma tregojnë mua, por ata më thanë: “Ç'është e vërteta, këtë hadith e ka transmetuar Haseni nga Ahnef ibn Kajsi, e ky nga Ebu Bekrete. Sulejmani na ka thënë: “Këtë na ka treguar Hamadi.” Muemeli ka thënë: “Na ka treguar Hamad ibn Zejdi, e këtij i kanë treguar Ejubi, Junusi, Hishami dhe Muala ibn Zejdi, nga Haseni, e ky nga Ahnefi, e ky nga Ebu Bekrete, e ky nga Pejgamberi ﷺ. Këtë e ka transmetuar edhe Mameri nga Ejubi. Po ashtu këtë e ka transmetuar Bekar ibn Abdulazizi nga babai i tij, e ky nga Ebu Bekrete. Gunderi ka thënë: “Na ka treguar Shuëbe nga Mensuri, e ky nga Ribi ibn Hirashi, e ky nga Ebu Bekrete, e ky nga Pejgamberi ﷺ. Ndërkaq Sufjani nuk e ka transmetuar direkt nga Mensuri.”

Muhamed ibn Muthena na ka thënë: Na ka treguar Velid ibn Muslimi, e këtij i ka treguar Ibn Xhabiri, e këtij i ka treguar Busr ibn Ubejdullah Hadremiu, e ky e ka dëgjuar Ebu Idris Havlaniun se Hudhejfe ibn Jemani (Allahu qoftë i kënaqur me të!) tregon: “Njerëzit e pyesnin të Dërguarin e Allahut ﷺ për mirësinë, kurse unë e pyesja për sherrin, nga frika se mos më zë. Njëherë, i thashë: “O i Dërguari i Allahut, më herët kemi qenë në injorancë dhe sherr, por Allahu na solli këtë mirësi. Vallë, pas kësaj mirësie do të ketë sherr sërish?” Pejgamberi ﷺ tha: “Po.” Thashë: “Po pas atij sherri, do të ketë sërish mirësi?” Pejgamberi ﷺ tha: “Po, por do të ketë turbullira.” Unë i thashë: “Çfarë turbullirash?” Ai tha: “Disa njerëz që nuk do të punojnë me mësimet e mia. Ca gjëra do t'ua pranoje dhe ca jo.” Unë e pyeta: “Po pas kësaj mirësie, do të ketë sherr sërish?” Ai u përgjigj: “Po, disa thirrës drejt dyerve të Xhehenemit. Ai që u përgjigjet, do të përfundojë në Zjarr.” Unë i thashë: “O i Dërguari i Allahut, na i përshkruaj ata!” Ai tha: “Ata do të jenë nga njerëzit tanë, që flasin me gjuhën tonë.” I thashë: “Me se më porosit, nëse e përjetoj atë kohë?” Ai tha: “Ndiqi muslimanët e unifikuar (në të vërtetën) dhe prijësin e tyre.” I thashë: “Po nëse nuk ka as (xhemat) të unifikuar, as prijës?” Ai tha: “Largohu prej të gjitha grupacioneve, edhe nëse detyrohesh ta kapësh me dhëmbë rrënjën e pemës dhe të qëndrosh në atë gjendje derisa të vdesësh.”

Abdullah ibn Jezidi na ka thënë: Na ka treguar Hajve dhe dikush tjetër, e këtyre dyve u ka treguar Ebu Esvedi; [t]: Lejthiu transmeton se Ebu Esvedi tregon: “Banorëve të Medinës iu kërkua që të formojnë një ekspeditë ushtarake, në të cilën u regjistrova edhe unë. Por, kur e takova Ikrimen dhe i tregova, ai rreptësisht më ndaloi nga ky veprim, pastaj më tha: “Ibn Abasi më ka treguar se, disa muslimanë ishin rreshtuar në radhët e idhujtarëve dhe, si rrjedhojë, e rrisnin numrin e tyre kundër të Dërguarit të Allahut ﷺ. Kishte raste kur shigjetat të shtiheshin në drejtim të tyre dhe të qëlloheshin, ose t'i godiste ndokush dhe t'i vriste. Atëherë Allahu zbriti ajetin: “Kur melekët ua marrin shpirtrat atyre që e kanë ngarkuar veten me faje, u thonë: “Ku ishit?” Ata përgjigjen: “Ishim të pafuqishëm në Tokë.” (Melekët) do t'u thonë: “A nuk qe Toka e Allahut e gjerë që të mërgonit në të?” Këta janë ata (njerëz), vendbanimi i të cilëve është Xhehenemi; eh, sa i keq është ai vendbanim!” (Nisa, 97)

Muhamed ibn Kethiri na ka thënë: Na ka rrëfyer Sufjani, e këtij i ka treguar Ameshi, e ky nga Zejd ibn Vehbiu se Hudhejfe (Allahu qoftë i kënaqur me të!) tregon: “I Dërguari i Allahut ﷺ na ka rrëfyer për dy gjëra, njërën prej të cilave e kam parë, kurse tjetrën po e pres.”
Ai na ka rrëfyer: “Besnikëria ka zbritur në thellësinë e zemrave të burrave, e pas kësaj ata mësuan prej Kuranit, e më vonë edhe prej Sunetit.” Pastaj, duke na rrëfyer për humbjen e besnikërisë, tha: “Njeriu bie në gjumë dhe i merret besnikëria prej zemrës së tij, saqë mbesin vetëm gjurmët, sikurse gjurmët e djegies. E, kur të bjerë në gjumë sërish, prapë i merret, duke i lënë gjurmë sikurse flluskat: si një gacë kur ta rrokullisësh me këmbë dhe shkakton flluskë në të, e sheh të fryrë, ndonëse brenda nuk ka asgjë. Njerëzit do të merren me shitblerje, porse pothuajse askush nuk do të do punojë me besnikëri, saqë do të thuhet: “Në filan fisin është një njeri besnik.” Po ashtu, njeriut i thuhet: “Sa i mençur, sa i zgjuar e sa i fuqishëm!”, por në zemër nuk ka besim as sa fara e sinapit.”
Hudhejfe vazhdon: “Pata arritur një kohë kur nuk brengosesha me kë bëja shitblerje, për sa kohë që ishte musliman, sepse Islami e ndalonte atë (nga mashtrimi), e, nëse ishte i krishterë, atë ma kthente udhëheqësi i tij. Ndërkaq, sot nuk bëj shitblerje, përpos me filanin e filanin.”

Kutejbe ibn Seidi na ka thënë: Na ka treguar Hatimi se Jezid ibn Ebu Ubejdi tregon se Seleme ibn Ekvai (Allahu qoftë i kënaqur me ta!) shkoi te Haxhaxhi, i cili i tha: “O Ibn Ekva, je kthyer prapa, je bërë beduin?”
- Jo, por i Dërguari i Allahut mua ma ka lejuar të jetoj në shkretëtirë, - i tha Ibn Ekvai.
Jezid ibn Ebu Ubejdi shton: “Pasi Othman ibn Afani u vra, Seleme ibn Ekvai shkoi në Rabedhe, ku u martua me një grua që i lindi disa fëmijë dhe qëndroi aty deri pak ditë para vdekjes, kur dhe u kthye në Medinë.”

Abdullah ibn Jusufi na ka thënë: Na ka rrëfyer Maliku, e ky nga Abdurrahman ibn Abdullah ibn Saësae, e ky nga babai i tij se Ebu Seid Hudriu (Allahu qoftë i kënaqur me të!) transmeton se i Dërguari i Allahut ﷺ ka thënë: “Kam frikë se është afruar koha kur pasuria më e mirë për muslimanin do të jetë një kope dhensh, të cilat do t'i kullotë nëpër maja të kodrave dhe thellësi të luginave, që me fenë e tij të ikë nga sprovat.”

Muadh ibn Fedale na ka thënë: Na ka treguar Hishami, e ky nga Katadja se Enesi (Allahu qoftë i kënaqur me të!) tregon: “Një ditë, të Dërguarin a Allahut ﷺ e pyetën aq shumë, saqë e tepruan. Kështu, ai hipi në minber dhe tha: “Çfarëdo që më pyesni sot, do t'jua sqaroj.” Unë shikoja djathtas e majtas dhe pashë se të gjithë kishin mbuluar kokat me rrobë dhe qanin. Aty ishte një njeri që, kur grindej me të tjerët, ia vishnin emrin e një babai tjetër. Ai u ngrit dhe tha: “O i Dërguari i Allahut, kë kam baba unë?”
- “Baba e ke Hudhafen”, - i tha Pejgamberi ﷺ.
Pastaj, Omeri reagoi dhe tha: “Jemi të kënaqur me Allahun për Zot, Islamin për fe dhe Muhamedin ﷺ për Pejgamber. Kërkojmë mbrojtjen e Allahut nga e keqja e sprovave!”
Atëherë i Dërguari i Allahut ﷺ tha: “Nuk kam parë ndonjëherë mirësi e sherr më të madh se sot. Xheneti dhe Zjarri m'u shfaqën pranë, saqë i pashë në këtë mur.”
Katadja ka thënë: “Ky hadith përmendet te ky ajet: “O besimtarë! Mos pyetni për gjëra, që, sikur t'ju thuheshin haptazi, nuk do t'ju pëlqenin...” (Maide, 101)

Abas Nersiu na ka thënë: Na ka treguar Jezid ibn Zureji, e këtij i ka treguar Seidi, e këtij i ka treguar Katadja se Enesi (Allahu qoftë i kënaqur me të!), duke rrëfyer hadithin paraprak, përmend: “... dhe të gjithë njerëzit kishin mbuluar kokat me rrobë dhe qanin.”
Po ashtu, ai përmend: “... dhe (Omeri) kërkoi mbrojtjen e Allahut kundrejt së keqes së sprovave.” Ose ka thënë: “Kërkoj mbrojtjen e Allahut kundrejt së keqes së sprovave!”

Halife më ka thënë: Na ka treguar Jezid ibn Zureji, e këtij i ka treguar Seidi dhe Muëtemiri, e ky i fundit nga babai i tij, nga Katadja se Enesi (Allahu qoftë i kënaqur me të!), duke rrëfyer hadithin paraprak, përmend: “... dhe (Omeri) kërkoi mbrojtjen e Allahut kundrejt sherrit të sprovave.”

Abdullah ibn Muhamedi më ka thënë: Na ka treguar Hisham ibn Jusufi, e ky nga Mameri, e ky nga Zuhriu, e ky nga Salimi se Abdullah ibn Omeri (Allahu qoftë i kënaqur me ta!) tregon se Pejgamberi ﷺ, hipur në minber, ka thënë: “Atje është fitneja! Atje është fitneja, prej nga paraqitet briri i shejtanit.” - Ose ka thënë: “Briri i Diellit.”

Kutejbe ibn Seidi na ka thënë: Na ka treguar Lejthiu, e ky nga Nafiu se Ibn Omeri (Allahu qoftë i kënaqur me ta!) tregon se i Dërguari i Allahut ﷺ, duke qenë kthyer nga lindja, tha: “Atje është fitneja, prej nga paraqitet briri i shejtanit!”

Ali ibn Abdullahu na ka thënë: Na ka treguar Ez'her ibn Sadi, e ky nga Ibn Avniu, e ky nga Nafiu se Ibn Omeri (Allahu qoftë i kënaqur me të!) transmeton se Pejgamberi ﷺ ka thënë:
- “O Allah, bekoje Shamin tonë! O Allah, bekoje Jemenin tonë!”
- O i Dërguari i Allahut, edhe Nexhdin tonë! - i thanë njerëzit.
- “O Allah, bekoje Shamin tonë! O Allah, bekoje Jemenin tonë!” - tha sërish Pejgamberi ﷺ.
- O i Dërguari i Allahut, edhe Nexhdin tonë! - ia përsëritën.
Mendoj se në herën e tretë i Dërguari i Allahut ﷺ tha: “Atje është burimi i tërmeteve dhe fitneve, si dhe prej aty do të paraqitet briri i shejtanit.”

Is'hak Vasitiu na ka thënë: Na ka treguar Halidi, e ky nga Bejani, e ky nga Vebra ibn Abdurrahmani se Seid ibn Xhubejri tregon: “Abdullah ibn Omeri doli në mesin tonë, ndërsa ne kishim dëshirë të na tregonte ndonjë hadith të mirë, porse një njeri na parapriu duke i thënë: “O Ebu Abdurrahman, na trego për luftën në kohë të fitnes, ngaqë Allahu thotë: “Luftojini ata derisa të zhduket fitneja...” (Bekare, 193)
Ibn Omeri i tha: “Mjerë nëna për ty! Vallë, e di ç'është fitneja? I Dërguari i Allahut ﷺ i luftonte idhujtarët sepse pranimi i fesë së tyre llogaritej fitne, kështu që ajo nuk ka qenë sikurse lufta juaj për pushtet.”

Omer ibn Hafs ibn Gijathi na ka thënë: Na ka treguar babai im, e këtij i ka treguar Ameshi se Shekiku tregon se e ka dëgjuar Hudhejfën (Allahu qoftë i kënaqur me të!) duke treguar: “Ishim në një ndejë tek Omeri dhe, ndërkohë, ai na pyeti:
- Cili prej jush e di hadithin e Pejgamberit ﷺ rreth fitneve (trazirave)?
Unë i thashë: “Fitnet e njeriut në familjen, pasurinë, fëmijët dhe fqinjët e tij shlyhen nga namazi i tij, sadakaja dhe urdhërimi në të mirë e ndalimi nga e keqja.”
- Nuk është kjo që po kërkoj. E kam fjalën për fitnen, e cila do të tallazohet siç tallazohet deti, - tha Omeri.
- Nuk ke pse shqetësohesh prej saj, o prijës i besimtarëve! Mes teje dhe saj është një derë e mbyllur, - i thashë.
- A do të thyhet kjo derë, vallë, apo do të hapet? - pyeti Omeri.
- Do të thyhet.
- Atëherë, nuk paska për t'u mbyllur më, - tha Omeri.
Shekiku thotë: “Dikush prej nesh e pyeti Hudhejfën: “A e dinte Omeri, vallë, se kush ishte ajo derë?” Ai tha: “Po, ashtu siç e dinte se të sotmen e pason e nesërmja, ngaqë unë i tregova një hadith që nuk përmban gënjeshtra.”
Nuk patëm guxim ta pyesnim Hudhejfën (kush ishte dera e përmendur në hadith), andaj e porositëm Mesrukun dhe ai e pyeti: “Kush ishte dera?” Ai tha: “Ajo derë ishte vetë Omeri.”

Seid ibn Ebu Merjemi na ka thënë: Na ka rrëfyer Muhamed ibn Xhaferi, e ky nga Sherik ibn Abdullahu, e ky nga Seid ibn Musejebi se Ebu Musa Eshariu (Allahu qoftë i kënaqur me të!) tregon: “Një ditë, Pejgamberi ﷺ shkoi në një kopsht të Medinës për të kryer nevojën. Unë i shkova pas dhe, kur ai hyri në kopsht, unë u ula te dera.” Thosha me vete: “Sot do t'i bëj rojë të Dërguarit të Allahut ﷺ, edhe pse nuk më ka urdhëruar.” Pejgamberi ﷺ shkoi, e kreu nevojën, pastaj u ul buzë pusit, i zbuloi kërcinjtë dhe i futi në ujë.
Pas pak erdhi Ebu Bekri dhe kërkoi leje të hyjë. Unë i thashë: “Prit të kërkoj leje për ty.” Ai u ndal dhe unë shkova te Pejgamberi ﷺ e i thashë: “O i Dërguari i Allahut, Ebu Bekri po kërkon leje.”
- “Jepi leje dhe përgëzoje me Xhenet”, - tha ai.
Ebu Bekri u ul në të djathtë të Pejgamberit ﷺ, i zbuloi kërcinjtë dhe i futi në ujë.
Më pas erdhi Omeri, të cilit, po ashtu, i thashë: “Prit të kërkoj leje për ty.” Pejgamberi ﷺ tha: “Jepi leje dhe përgëzoje me Xhenet.” Ai erdhi dhe u ul në të majtë të Pejgamberit ﷺ, i zbuloi kërcinjtë dhe i futi në ujë. Kështu, u zunë vendet buzë pusit dhe nuk mbeti më vend aty.
Pastaj erdhi Othmani, të cilit i thashë: “Prit të kërkoj leje për ty. Pejgamberi ﷺ tha: “Jepi leje dhe përgëzoje me Xhenet, pas një sprove që do ta godasë.”
Ai hyri, porse nuk gjeti vend të ulet me ta, andaj shkoi dhe u doli përballë, në anën tjetër të pusit. Edhe ai i zbuloi kërcinjtë dhe i futi në ujë. Unë kisha dëshirë që edhe vëllai im të vinte, andaj e lusja Allahun që edhe ai të vinte.
Seid ibn Musejebi thotë: “Renditjen e uljes së tyre e komentova me pozitën e varreve të tyre. Ata tre u bashkuan, kurse Othmani u veçua.”

Bishr ibn Halidi më ka thënë: Na ka rrëfyer Muhamed ibn Xhaferi, e ky nga Shuëbe, e ky nga Sulejmani se Ebu Vaili tregon: “Dikush i tha Usames (Allahu qoftë i kënaqur me të!): “Sikur të bisedoje me këtë (Othmanin).” Ai tha: “Kam biseduar me të (në vetmi për këto çështje) pa hapur ndonjë derë (të fitnes), ashtu që të mos jem i pari që e hap atë. Nuk jam asi burri që të mund t'i them dikujt që është bërë prijës i dy personave se ti je më i mirë. Kjo, se e kam dëgjuar të Dërguarin e Allahut ﷺ të ketë thënë: “(Në ditën e Kiametit) do të sillet një njeri dhe do të hidhet në Zjarr, ku do të sillet rrotull, siç sillet gomari rreth rrotës së mullirit. Banorët e Zjarrit do të tubohen rreth tij dhe do ta pyesin: “O filan, a nuk urdhëroje për të mirë e ndaloje nga e keqja?” Ai do të përgjigjet: “Ju urdhëroja për të mirë, por vetë nuk e punoja, si dhe ju ndaloja nga e keqja, por vetë e punoja.”

Othman ibn Hejthemi na ka thënë: Na ka treguar Aufi, e ky nga Haseni se Ebu Bekrete (Allahu qoftë i kënaqur me të!) tregon: “Në Luftën e Xhemelit, Allahu më bëri dobi me një fjalë: “Kur Pejgamberit ﷺ i arriti lajmi se persianët e kishin zgjedhur për mbretëreshë vajzën e Kisrait, tha: “Nuk do të shpëtojë një popull që për udhëheqëse kanë zgjedhur një femër.”

Abdullah ibn Muhamedi na ka thënë: Na ka treguar Jahja ibn Ademi, e këtij i ka treguar Ebu Bekër ibn Ajashi, e këtij i ka treguar Ebu Hasini, e këtij i ka treguar Ebu Merjemi se Abdullah ibn Zijad Esediu tregon: “Kur Talhai, Zubejri dhe Aishja shkuan në Basra, Aliu dërgoi Amar ibn Jasirin dhe Hasen ibn Aliun te ne në Kufe. Ata hipën në minber, ashtu që Hasen ibn Aliu ndodhej më lart, ndërkaq Amari poshtë Hasenit. Ne u mblodhëm pranë tij, ku e dëgjova Amarin duke thënë: “Aishja ka shkuar në Basra. Betohem në Allahun se ajo është bashkëshortja e Pejgamberit tuaj ﷺ, në dynja dhe ahiret, porse Allahu i Madhëruar ju ka sprovuar, që ta dijë nëse do t'i bindeni atij (Aliut) apo asaj.”

Ebu Nuajmi na ka thënë: Na ka treguar Ibn Ebu Ganije, e ky nga Hakemi se Ebu Vaili tregon: “Amari hipi në minberin e Kufes, ku përmendi Aishen dhe vajtjen e saj në Basra, pastaj tha: “Ajo është gruaja e Pejgamberit tuaj ﷺ, në dynja dhe në ahiret, porse ju jeni sprovuar me të.”

7102. 7103. 7104. Bedel ibn Muhaberi na ka thënë: Na ka treguar Shuëbe, e këtij i ka rrëfyer Amri se Ebu Vaili tregon: “Ebu Musai dhe Ebu Mesudi shkuan tek Amari, të cilin Aliu e kishte dërguar te banorët e Kufes për t'i thirrur për luftë. Ata i thanë: “Që kur e ke pranuar Islamin, nuk të kemi parë të bësh vepër më të urryer, sipas nesh, sesa angazhimi yt për këtë çështje. Amari ua ktheu: “Që kur e keni pranuar Islamin, nuk ju kam parë të bëni vepër më të urryer, sipas meje, sesa mosangazhimi juaj për këtë çështje. Pastaj u dha nga një rrobë dhe shkuan në xhami.”

7102. 7103. 7104.

7102. 7103. 7104.

7105. 7106. 7107. Abdani transmeton nga Ebu Hamzai, e ky nga Ameshi se Shekik ibn Seleme tregon: Teksa po rrija me Ebu Mesudin, Ebu Musain dhe Amarin, Ebu Mesudi tha: “Po desha, do të flisja për të gjithë shokët e tu, përveç teje (o Amar). Mirëpo, që kur je ndarë nga Pejgamberi ﷺ, nuk të kam parë të bësh vepër më të shëmtuar, sipas meje, sesa angazhimi yt për këtë çështje.”
Amari ia ktheu: “O Ebu Mesud, që kur jeni ndarë nga Pejgamberi ﷺ, ti dhe shoku yt, nuk ju kam parë të bëni vepër më të shëmtuar, sipas meje, sesa mosangazhimi juaj për këtë çështje. Ebu Mesudi, që atëkohë ishte pasanik, i tha shërbëtorit: “O djalosh, m'i sill dy palë rroba! Kështu, njërën ia dha Ebu Musait, kurse tjetrën Amarit dhe u tha: “Shkoni me to në xhuma.”

7105. 7106. 7107.

7105. 7106. 7107.

Abdullah ibn Othmani na ka thënë: Na ka rrëfyer Abdullahu, e këtij i ka rrëfyer Junusi, e ky nga Zuhriu, e këtij i ka rrëfyer Hamza ibn Abdullah ibn Omeri se Ibn Omeri (Allahu qoftë i kënaqur me ta!) transmeton se i Dërguari i Allahut ﷺ ka thënë: “Kur Allahu e zbret dënimin mbi një popull, dënimi i godet të gjithë ata që janë në mesin e tyre, pastaj ringjallen sipas veprave.”

Ali ibn Abdullahu na ka thënë: Na ka treguar Sufjani, e këtij i ka treguar Israil Ebu Musai, - të cilin Sufjani e ka takuar në Kufe kur kishte ardhur tek i biri i Shubrumes, dhe i tha: “Më lejo të hyj tek Isai dhe ta këshilloj!” Siç duket i biri i Shubrumes u frikësuar për të, andaj nuk e la, se Hasen Basriu tregon: “Kur Hasen ibn Aliu ia mësyu Muaviut me batalione, Amër ibn Asi iu drejtua Muaviut: “Po shoh një batalion që nuk kthehet, pa u kthyer kundërshtari i tyre.” Muaviu tha: “E kush përkujdeset për familjarët e muslimanëve?” Ai tha: “Unë.”
Atëherë, Abdullah ibn Amiri dhe Abdurrahman ibn Semure thanë: “Po e takojmë dhe po ia propozojmë pajtimin.”
Hasen Basriu ka thënë: “E kam dëgjuar Ebu Bekreten (Allahu qoftë i kënaqur me të!) të thotë: “Teksa Pejgamberi ﷺ mbante ligjëratë (në minber) erdhi Haseni, e në atë rast Pejgamberi ﷺ tha: “Ky biri im është zotëri. Shpresoj që Allahu nëpërmjet tij t'i pajtojë dy grupe të mëdha të muslimanëve.”

Ali ibn Abdullahu na ka thënë: Na ka treguar Sufjani, e këtij i ka thënë Amri, e këtij i ka rrëfyer Muhamed ibn Aliu se Harmele tregon: “Usame më dërgoi tek Aliu (për t'i kërkuar ndihmë materiale) dhe më tha: “Ai do të të pyesë: “Çfarë e shtyri shokun tënd (Usamen) të mos marrë pjesë?” Ti përgjigju: “Ai po të thotë: “Sikur të ishe në gojë të luanit, do të dëshiroja që edhe unë të isha aty me ty, mirëpo këtë nuk e shoh të lejuar (sepse do të vriten muslimanët). Kështu, Aliu nuk më dha asgjë. Pastaj, shkova te Haseni, Husejni dhe Ibn Xhaferi, të cilët ma mbushën kafshën (me ndihma materiale).”

Sulejman ibn Harbi na ka thënë: Na ka treguar Hamad ibn Zejdi, e ky nga Ejubi se Nafiu tregon: “Kur banorët e Medinës e tërhoqën besën dhënë Jezid ibn Muaviut, Ibn Omeri (Allahu qoftë i kënaqur me ta!) i mblodhi shërbëtorët dhe bijtë e vet e u tha: “E kam dëgjuar Pejgamberin ﷺ të ketë thënë: “Ditën e Kiametit, çdo tradhtar do të ketë një flamur.” Ne këtij njeriu ia dhamë besën në Allahun dhe të Dërguarin e Tij. Unë nuk di tradhti më të madhe sesa t'i jepet dikujt besa në Allahun dhe në të Dërguarin e Tij e pastaj të luftohet kundër tij. Unë distancohem nga çdonjëri prej jush që e ka tërhequr besën ose nuk i është besatuar fillimisht.”

Ahmed ibn Junusi na ka thënë: Na ka treguar Ebu Shihabi, e ky nga Aufi se Ebu Minhali tregon: “Në kohën kur Ibn Zijadi dhe Mervani u ngritën në Sham dhe Ibn Zubejri u ngrit në Mekë, ndërsa në anën tjetër hafëzët u ngritën në Basra, unë dhe babai im shkuam tek Ebu Berze Eslemiu. Kur hymë në shtëpinë e tij, e gjetëm të ulur nën hije të një dhome prej kallami. U ulëm aty dhe babai im e nxiti të flasë duke i thënë: “O Ebu Berze, a nuk sheh çfarë i ka gjetur njerëzit?”
Gjëja e parë që e dëgjova të thoshte ishte: “Unë shpresoj shpërblim tek Allahu se jam hidhëruar me disa fise kurejshe. Ju, o arabë, siç e dini, keni qenë në gjendje nënçmimi: të paktë e të humbur dhe Allahu ju shpëtoi me Islam dhe me Muhamedin ﷺ e ju solli deri në këtë gjendje (krenarie dhe udhëzimi). Dhe ja, tani dynjaja po ju prish mes vete. Betohem në Allahun se ai në Sham (Mervan ibn Hakemi) nuk lufton për tjetër veçse për dynja. Ndërkaq, këta të tjerët mbrapa jush, për Allahun, nuk luftojnë për tjetër veçse për dynja, e edhe ai në Mekë, për Allahun, nuk lufton për tjetër veçse për dynja.”

Adem ibn Ebu Ijasi na ka thënë: Na ka treguar Shuëbe, e ky nga Vasil Ahdebi se Ebu Vaili tregon se Hudhejfe ibn Jemani ka thënë: “Hipokritët e sotëm janë më të këqij sesa ata të kohës së Pejgamberit ﷺ: atëbotë ata fshiheshin, kurse sot shfaqen haptazi.”

Haladi na ka thënë: Na ka treguar Misari, e ky nga Habib ibn Ebu Thabiti se Ebu Sha'thai tregon se Hudhejfe (Allahu qoftë i kënaqur me të!) ka thënë: “Hipokrizia ka ekzistuar gjatë periudhës së Pejgamberit ﷺ, kurse sot është kufër (mohim i qartë) pas besimit.”

Ismaili na ka thënë: Më ka treguar Maliku, e ky nga Ebu Zinadi, e ky nga Arexhi se Ebu Hurejra (Allahu qoftë i kënaqur me të!) transmeton se Pejgamberi ﷺ ka thënë: “Kiameti nuk do të ndodhë pa ardhur koha kur njeriu të kalojë pranë varrit të tjetrit dhe të thotë: “Ah, sikur të isha në vend të tij!”

Ebu Jemani na ka thënë: Na ka rrëfyer Shuajbi, e ky nga Zuhriu, e këtij i ka thënë Seid ibn Musejebi se Ebu Hurejra (Allahu qoftë i kënaqur me të!) transmeton se i Dërguari i Allahut ﷺ ka thënë: “Kiameti nuk do të ndodhë pa u shkundur trupat e grave të devsit rreth Dhul Halasës.”
Dhu halasa ka qenë një idhull i fisit devs, të cilin e adhuronin në periudhën paraislame.

Abdulaziz ibn Abdullahu na ka thënë: Më ka treguar Sulejmani, e ky nga Thevriu, e ky nga Ebu Gajthi se Ebu Hurejra (Allahu qoftë i kënaqur me të!) transmeton se i Dërguari i Allahut ﷺ ka thënë: “Kiameti nuk do të ndodhë pa u paraqitur një pjesëtar i fisit kahtan duke u grahur njerëzve me shkopin e tij.”

Ebu Jemani na ka thënë: Na ka rrëfyer Shuajbi, e ky nga Zuhriu, e këtij i ka thënë Seid ibn Musejebi se Ebu Hurejra (Allahu qoftë i kënaqur me të!) transmeton se i Dërguari i Allahut ﷺ ka thënë: “Kiameti nuk do të ndodhë pa u paraqitur një zjarr në trojet e Hixhazit, i cili do t'i ndriçojë qafat e deveve në Busra.”

Abdullah ibn Seid Kindiu na ka thënë: Na ka treguar Ukbe ibn Halidi, e këtij i ka treguar Ubejdullahu, e ky nga Hubejb ibn Abdurrahmani, e ky nga gjyshi i tij Hafs ibn Asimi se Ebu Hurejra (Allahu qoftë i kënaqur me të!) transmeton se i Dërguari i Allahut ﷺ ka thënë: “Lumi Eufrat do të nxjerrë një thesar me ar. Ata që do të jenë të pranishëm, të mos marrin prej tij asgjë.”

Ukbe na ka thënë: “Na ka treguar Ubejdullahu, e këtij i ka treguar Ebu Zinadi, e ky nga Arexhi, e ky nga Ebu Hurejra, e ky nga Pejgamberi ﷺ ngjashëm, porse ky ka shtuar se: “... do të nxjerrë një kodër me ar...”

Musededi na ka thënë: Na ka treguar Jahjai, e ky nga Shuëbe, e këtij i ka treguar Mabedi se Harithe ibn Vehbiu (Allahu qoftë i kënaqur me të!) tregon: “E kam dëgjuar të Dërguarin e Allahut ﷺ duke thënë: “Jepni lëmoshë, se do të vijë një kohë kur njeriu do të sillet me lëmoshën e vet, porse nuk do të gjejë askënd që t'ia pranojë.”

Musededi ka thënë: “Harithe është vëllai i Ubejdullah ibn Omerit nga nëna. Kështu ka thënë Ebu Abdullahu.”

Ebu Jemani na ka thënë: Na ka rrëfyer Shuajbi, e këtij i ka treguar Ebu Zinadi, e ky nga Abdurrahmani se Ebu Hurejra (Allahu qoftë i kënaqur me të!) transmeton se i Dërguari i Allahut ﷺ ka thënë: “Kiameti nuk do të ndodhë pa luftuar mes vete dy grupe të mëdha, mes të cilëve do të zhvillohet një betejë e madhe, ndonëse të dyja thërrasin në të njëjtën gjë; si dhe pa u paraqitur përafërsisht tridhjetë dexhallë gënjeshtarë, ku secili do të pretendojë se është i dërguar i Allahut; pa ardhur koha kur largohet dituria, shpeshtohen tërmetet, shkurtohet koha, shfaqen fitnet, shpeshtohet herxhi, - që nënkupton vrasjet e shumta, - dhe shtohet pasuria në mesin tuaj dhe tepron, saqë i pasuri do të brengoset se kush do t'ia pranojë lëmoshën: kur t'ia ofrojë ndokujt, ai i përgjigjet: “Nuk kam nevojë për të.” Kiameti s'do të ndodhë pa ardhur koha kur njerëzit do të bëjnë gara me ndërtesa dhe kur njeriu të kalojë pranë varrit të tjetrit e të thotë: “Ah, sikur të isha në vendin e tij!” Kiameti s'do të ndodhë pa lindur dielli nga perëndimi, e në atë rast, kur njerëzit e shohin, të gjithë besojnë, por kjo është koha kur: “... nuk do t'i bëjë dobi askujt besimi i tij, nëse nuk ka besuar më parë ose nuk ka bërë ndonjë të mirë me besimin e tij...” (Enam, 158) Kur të ndodhë Kiameti, dy persona që ia kanë shpalosur rrobat njëri-tjetrit, nuk do të arrijnë as t'i shesin e as t'i palosin. Kur të ndodhë Kiameti, personi që ka mjelë devenë, nuk do të arrijë ta pijë qumështin e saj. Kur të ndodhë Kiameti, personi që ka rregulluar pusin, nuk do të arrijë të nxjerrë ujë prej tij. Kur të ndodhë Kiameti, personi që ka ngritur kafshatën te goja, nuk do të arrijë ta hajë.”

Musededi na ka thënë: Na ka treguar Jahjai, e këtij i ka treguar Ismaili, e këtij i ka treguar Kajsi se Mugire ibn Shuëbe (Allahu qoftë i kënaqur me të!) tregon: “Askush nuk e ka pyetur Pejgamberin ﷺ më tepër se unë në lidhje me Dexhallin, andaj njëherë më tha: “Çfarë po të mundon në lidhje me të?”
- Ata po thonë se ai ka një kodër me bukë dhe një lumë me ujë, - i thashë.
- “Përkundrazi, tek Allahu ai është më i pavlerë se kaq”, - tha Pejgamberi ﷺ.”

Musa ibn Ismaili na ka thënë: Na ka treguar Vuhejbi, e këtij i ka treguar Ejubi, e ky nga Nafiu se Ibn Omeri (Allahu qoftë i kënaqur me ta!) transmeton se Pejgamberi ﷺ (për Dexhallin) ka thënë: “Ai është i verbër në syrin e djathtë, që i duket si kokërr e dalë rrushi.”

Sad ibn Hafsi na ka thënë: Na ka treguar Shejbani, e ky nga Jahjai, e ky nga Is'hak ibn Abdullah ibn Ebu Talhai se Enes ibn Maliku (Allahu qoftë i kënaqur me të!) transmeton se Pejgamberi ﷺ ka thënë: “Dexhalli do të vijë deri në afërsi të Medinës. Pastaj, Medina do të dridhet tri herë, e në atë rast çdo jobesimtar dhe hipokrit do të dalë (prej saj) tek ai (Dexhalli).”

Abdulaziz ibn Abdullahu na ka thënë: Na ka treguar Ibrahim ibn Sadi, e ky nga babai i tij, e ky nga gjyshi i tij se Ebu Bekrete (Allahu qoftë i kënaqur me të!) transmeton se Pejgamberi ﷺ ka thënë: “Në Medinë nuk do të hyjë tmerri i mesihut Dexhall. Atëkohë ajo do t'i ketë shtatë porta. Në secilën prej tyre do të jenë nga dy melekë.”

Ali ibn Abdullahu na ka thënë: Na ka treguar Muhamed ibn Bishri, e këtij i ka treguar Misari, e këtij i ka treguar Sad ibn Ibrahimi se Ebu Bekrete (Allahu qoftë i kënaqur me të!) transmeton se Pejgamberi ﷺ ka thënë: “Në Medinë nuk do të hyjë tmerri i mesihut (Dexhall). Atëkohë ajo do t'i ketë shtatë porta. Në secilën portë do të jenë nga dy melekë.”

Ibn Is'haku transmeton nga Salih ibn Ibrahimi, e ky nga babai i tij se ka thënë: “Shkova në Basra dhe Ebu Bekrete më tha: “Këtë e kam dëgjuar nga Pejgamberi ﷺ.”

Abdulaziz ibn Abdullahu na ka thënë: Na ka treguar Ibrahimi, e ky nga Salihu, e ky nga Ibn Shihabi, e ky nga Salim ibn Abdullahu se Abdullah ibn Omeri (Allahu qoftë i kënaqur me të!) tregon: “I Dërguari i Allahut ﷺ u ngrit ndër njerëz, e lavdëroi Allahun ashtu siç i takon, pastaj e përmendi Dexhallin dhe tha: “Po jua tërheq vërejtjen nga ai. Nuk ka pejgamber që nuk ia ka tërhequr vërejtjen popullit të vet në lidhje me të. Por, unë do t'ju tregoj diçka për të, që asnjë pejgamber nuk i ka treguar popullit të vet: dijeni se ai është i verbër në njërin sy, kurse Allahu nuk është i verbër.”

Jahja ibn Bukejri na ka thënë: Na ka treguar Lejthiu, e ky nga Ukajli, e ky nga Ibn Shihabi, e ky nga Salimi se Abdullah ibn Omeri (Allahu qoftë i kënaqur me ta!) transmeton se i Dërguari i Allahut ﷺ ka thënë: “Teksa isha në gjumë, pashë në ëndërr veten duke bërë tavaf rreth Qabesë. Aty pashë një burrë zeshkan, me flokë të gjatë e të drejtë, teksa koka i pikonte ujë. Pyeta: “Kush është ky?” Më thanë: “I biri i Merjemes.” Kur shkova të shikoj, pashë edhe një burrë tjetër trupmadh e të kuq, me kaçurrela të dendura, me njërin sy të verbër, që i dukej sikurse kokërr e dalë rrushi.” Ata më thanë: “Ky është Dexhalli. Njeriu që më së shumti i ngjasonte ishte Ibn Katani.”
Zuhriu thotë: “Ibn Katani ka qenë pjesëtar i fisit huzaë.”

Abdulaziz ibn Abdullahu na ka thënë: Na ka treguar Ibrahim ibn Sadi, e ky nga Salihu, e ky nga Ibn Shihabi, e ky nga Urve se Aishja (Allahu qoftë i kënaqur me të!) tregon: “E kam dëgjuar të Dërguarin e Allahut ﷺ në namaz duke kërkuar mbrojtje nga sprova e Dexhallit.”

Abdani na ka thënë: Më ka rrëfyer babai im, e ky nga Shuëbe, e ky nga Abdulmeliku, e ky nga Ribiu se Hudhejfe (Allahu qoftë i kënaqur me të!) tregon se Pejgamberi ﷺ, në lidhje me Dexhallin, ka thënë: “Me vete do të ketë ujë dhe zjarr. Zjarri i tij është ujë i freskët; kurse uji i tij është zjarr.”

Ebu Mesudi ka thënë: “E kam dëgjuar këtë nga i Dërguari i Allahut ﷺ.”

Sulejman ibn Harbi na ka thënë: Na ka treguar Shuëbe, e ky nga Katadja se Enesi (Allahu qoftë i kënaqur me të!) transmeton se Pejgamberi ﷺ ka thënë: “Çdo pejgamber që është dërguar ia ka tërhequr vërejtjen popullit të vet në lidhje me të verbrin gënjeshtar (Dexhallin). Ai është i verbër në njërin sy, kurse Zoti juaj nuk është i verbër. Mes syve të tij shkruan: kafir.”

Këtë e kanë transmetuar edhe Ebu Hurejra dhe Ibn Abasi nga Pejgamberi ﷺ.

Ebu Jemani na ka thënë: Na ka rrëfyer Shuajbi, e ky nga Zuhriu, e këtij i ka rrëfyer Ubejdullah ibn Abdullah ibn Utbe ibn Mesudi se Ebu Seidi (Allahu qoftë i kënaqur me të!) tregon: “Një ditë, i Dërguari i Allahut ﷺ na rrëfeu një hadith të gjatë për Dexhallin dhe, mes të tjerash, tha: “Dexhalli do të vejë deri në disa zona të shkreta rreth Medinës, porse do ta ketë të ndaluar të hyjë brenda saj. Atë ditë do t'i dalë një njeri, që do të llogaritet si njeriu më i mirë, ose ndër më të mirët, dhe do t'i thotë: “Dëshmoj se ti je Dexhalli, për të cilin na ka treguar i Dërguari i Allahut ﷺ.” Dexhalli u thotë (ithtarëve të tij): “Nëse e vras këtë e pastaj e ringjall, a do të keni dyshim në çështjen time?”
- Jo, - i thonë ata.
Kështu, e vret atë e më pas e ringjall. Personi në fjalë (pasi të ringjallet) i thotë: “Betohem në Allahun se asnjëherë nuk kam qenë më i bindur se sot (se ti je Dexhalli).” Dexhalli do të tentojë ta vrasë atë, por nuk do të mundet.”

Abdullah ibn Mesleme na ka transmetuar nga Maliku, e ky nga Nuajm ibn Abdullah Muxhmiri se Ebu Hurejra (Allahu qoftë i kënaqur me të!) transmeton se i Dërguari i Allahut ﷺ ka thënë: “Në hyrjet e Medinës ka melekë (që e ruajnë atë). Në të nuk hyn as murtaja e as Dexhalli.”

Jahja ibn Musai më ka thënë: Na ka treguar Jezid ibn Haruni, e këtij i ka rrëfyer Shuëbe, e ky nga Katadja se Enes ibn Maliku (Allahu qoftë i kënaqur me të!) transmeton se Pejgamberi ﷺ ka thënë: “Dexhalli do të vijë në Medinë, ku do të hasë melekët duke e ruajtur, andaj nuk do të mund t'i afrohet; e as murtaja, me lejen e Allahut (nuk hyn në të).”

Ebu Jemani na ka thënë: Na ka rrëfyer Shuajbi, e ky nga Zuhriu; [t]: Ismaili na ka thënë: Na ka treguar vëllai im, e ky nga Sulejmani, e ky nga Muhamed ibn Ebu Atiku, e ky nga Ibn Shihabi, e ky nga Urve ibn Zubejri, e këtij i ka treguar Zejnebe bint Ebu Seleme, e kësaj i ka treguar Umu Habibe bint Ebu Sufjani se Zejnebe bint Xhahshi (Allahu qoftë i kënaqur me të!) tregon se i Dërguari i Allahut ﷺ vajti tek ajo i frikësuar duke thënë: “La ilahe il-lallah! Mjerë arabët nga sherri që është afruar! Sot është hapur një pjesë e pendës së jexhuxhëve dhe mexhuxhëve, sa kjo” - dhe e përtheu gishtin e madh me treguesin duke formuar një unazë. I thashë: “O i Dërguari i Allahut, vallë, ndodh të shkatërrohemi, ndërkohë në mesin tonë ka njerëz të mirë?”
- “Po, nëse përhapet e keqja (paturpësia)”, - u përgjigj ai.

Musa ibn Ismaili na ka thënë: Na ka treguar Vuhejbi, e këtij i ka treguar Ibn Tavusi, e ky nga babai i tij se Ebu Hurejra (Allahu qoftë i kënaqur me të!) transmeton se Pejgamberi ﷺ ka thënë: “Do të hapet një pjesë e pendës së jexhuxhëve dhe mexhuxhëve, sa kjo.” Vuhejbi e përtheu gishtin e madh me treguesin duke formuar numrin nëntëdhjetë (në formë unaze).