Sahihu i Buhariut — Hadithi 346
7. Nënkapitulli: Nëse personi xhunub ka frikë se do ta godasë ndonjë sëmundje, vdekja ose etja, merr tejemum
Tregohet se, një natë të ftohtë, Amër ibn Asi u bë xhunub, ndaj mori tejemum e pastaj e lexoi ajetin: “... dhe mos e mbytni vetveten! Allahu është shumë i mëshirshëm ndaj jush.” (Nisa, 29) I treguan Pejgamberit ﷺ dhe ai nuk e qortoi.
346. Nga: Shekik ibn Seleme
Omer ibn Hafsi na ka thënë: Na ka treguar babai im, e këtij i ka treguar Ameshi se Shekik ibn Seleme tregon: “Isha i pranishëm kur Ebu Musai e pyeti Abdullah ibn Mesudin (Allahu qoftë i kënaqur me ta!):
- O Ebu Abdurrahman, nëse dikush është xhunub dhe nuk gjen ujë, si të veprojë?
- Nuk falet, derisa të gjejë ujë, - tha Abdullahu.
- E çfarë mendon për fjalën që Pejgamberi ﷺ i ka thënë Amarit: “Të mjafton (tejemumi)”, - pyeti Ebu Musai.
- A nuk ke parë se Omeri nuk është bindur në këtë? - i tha Abdullahu.
- Ta lëmë anash fjalën e Amarit, po çfarë vepron me këtë ajet (të sures Maide)? - i tha Ebu Musai.
Abdullahu nuk dinte si t'i përgjigjej, andaj tha:
- Sikur t'u lejohej kjo, frikësohem se, kur të ndiejnë të ftohtë nga uji, do ta braktisin atë e do të marrin tejemum.
(Ameshi thotë:) E pyeta Shekikun: “A vetëm për këtë Abdullahu e urrente marrjen e tejemumit?” Shekiku tha: “Po.”