Hadithet e ngjashme me hadithin 152

Muhamed ibn Beshari na ka thënë: Na ka treguar Muhamed ibn Xhaferi, e këtij i ka treguar Shuëbe, e ky nga Ata Ibn Ebu Mejmune se Enes ibn Maliku (Allahu qoftë i kënaqur me të!) tregon: “Kur i Dërguari i Allahut ﷺ hynte në nevojtore, unë dhe një djalosh tjetër ia mbanim shkopin e tij dhe shakullin me ujë, me të cilën pastrohej.”

Transmetimin e Muhamed ibn Xhaferit nga Shuëbe e forcojnë Nadri dhe Shedhani. Shkopi e kishte majën e metaltë.

Jakub ibn Ibrahimi na ka thënë: Na ka treguar Ismail ibn Ibrahimi, e këtij i ka treguar Revh ibn Kasimi, e këtij i ka treguar Ata ibn Ebu Mejmune se Enes ibn Maliku (Allahu qoftë i kënaqur me të!) ka thënë: “Pasi Pejgamberi ﷺ shkonte për ta kryer nevojën, unë i çoja ujë dhe pastrohej me të.”

Ebu Velid Hisham ibn Abdulmeliku na ka thënë: Na ka treguar Shuëbe, e ky nga Ebu Muadh Ata ibn Ebu Mejmune, se Enes ibn Maliku (Allahu qoftë i kënaqur me të!) ka thënë: “Kur Pejgamberi ﷺ dilte për të kryer nevojën, unë dhe një djalosh tjetër i afronim një shakull me ujë, që të pastrohej nga nevoja fiziologjike.”

Sulejman ibn Harbi na ka thënë: Na ka treguar Shuëbe, e ky nga Ebu Muadh Ata ibn Ebu Mejmune se Enesi (Allahu qoftë i kënaqur me të!) ka thënë: “Kur i Dërguari i Allahut ﷺ dilte për të kryer nevojën, unë dhe një djalosh tjetër e përcillnim për t'ia afruar shakullin me ujë.”

Muhamed ibn Hatim ibn Beziu na ka thënë: Na ka treguar Shadhani, e ky nga Shuëbe, e ky nga Ata ibn Ebu Mejmune se Enes ibn Maliku (Allahu qoftë i kënaqur me të!) ka thënë: “Kur Pejgamberi ﷺ shkonte për të kryer nevojën, unë dhe një djalosh tjetër e përcillnim duke bartur një shkop bastun ose shkop të gjatë me majë të mprehtë sikurse shtiza dhe një kovë (me ujë). Pasi e kryente nevojën, ia afronim kovën.”