Hadithet e ngjashme me hadithin 3648

Abdulaziz ibn Abdullahu na ka thënë: Më ka treguar Maliku, e ky nga Ibn Shihabi, e ky nga Araxhi se Ebu Hurejra (Allahu qoftë i kënaqur me të!) ka thënë: “Njerëzit po thonë se Ebu Hurejra e ka tepruar së transmetuari, mirëpo, sikur të mos ishin dy ajete të Kuranit famëlartë, nuk do t'ju kisha treguar asnjë hadith. Pastaj lexoi: “Me të vërtetë, ata që fshehin shpalljet Tona të qarta, pasi ua kemi shpjeguar njerëzve në Libër (Tevrat), do të mallkohen nga Allahu dhe do të mallkohen nga ata (melekë e njerëz) që janë ngarkuar të mallkojnë. Mirëpo atyre që pendohen, përmirësohen dhe tregojnë atë që kishin fshehur, Unë ua pranoj pendimin, sepse Unë jam Pranuesi i pendimeve dhe Mëshirëploti.” (Bekare, 159-160) Vëllezërit tanë muhaxhirë kanë qenë të zënë me tregti, vëllezërit ensarë kanë qenë të zënë me punët e fushës, kurse Ebu Hurejra e shoqëronte të Dërguarin e Allahut ﷺ për një bark bukë, ishte i pranishëm aty ku ata nuk ishin dhe mësonte përmendsh gjëra që ata nuk i mësonin.”

Ahmed ibn Ebu Bekër Ebu Musabi na ka thënë: Na ka treguar Muhamed ibn Ibrahim ibn Dinari, e ky nga Ibn Ebu Dhiëbi, e ky nga Seid Makburiu se Ebu Hurejra (Allahu qoftë i kënaqur me të!) tregon: “Thashë: “O i Dërguari i Allahut!, unë po dëgjoj prej teje hadithe të shumta, mirëpo po i harroj.”
Pejgamberi ﷺ më tha: “Shtroje rrobën (në tokë).”
Pasi e shtrova, Pejgamberi ﷺ bëri sikur po mbushte diçka me duar, pastaj më tha: “Vishe!” Që kur e kam veshur, nuk kam harruar asgjë.”

Ibrahim ibn Mundhiri na ka thënë: “Njëjtë na ka treguar Ibn Ebu Fudejku (dhe shton se) ose ka thënë: “(sikur) po mbushte diçka me duar në të.”