Hadithet e ngjashme me hadithin 6805

Musededi na ka thënë: Na ka treguar Jahjai, e ky nga Shuëbe, e këtij i ka treguar Katadja se Enesi (Allahu qoftë i kënaqur me të!) tregon: “Disa njerëz nga Urejna erdhën në Medinë, por nuk u pëlqeu klima (kështu që u sëmurën). I Dërguari i Allahut ﷺ ua lejoi të shkonin te devetë e dhëna për zekat e të pinin nga qumështi dhe urina e tyre (për shërim). Mirëpo, ata e vranë bariun dhe e morën kopenë e deveve, andaj i Dërguari i Allahut ﷺ dërgoi dikë (në kërkim të tyre) dhe i sollën. Kështu (si dënim dhe shpagim ndaj bariut të vrarë), ua preu duart e këmbët, ua nxori sytë me hekur të nxehtë (sepse kështu kishin vepruar me bariun) dhe i la në tokën e Harres (vend në lindje të Medinës, që të vdisnin) duke kafshuar gurët (nga etja e madhe ose dhimbjet e hatashme).”

Transmetimin e Katades e ka fuqizuar Ebu Kilabe, Humejdi dhe Thabiti nga Enesi.

Sulejman ibn Harbi na ka thënë: Na ka treguar Hamad ibn Zejdi, e ky nga Ejubi, e ky nga Ebu Kilabe se Enesi (Allahu qoftë i kënaqur me të!) tregon: “Disa njerëz erdhën nga Ukli, - ose ka thënë: nga Urejna, - në Medinë, por nuk iu përshtat klima, kështu që u sëmurën. Pejgamberi ﷺ i urdhëroi të shkonin te devetë (e sadakasë) e të pinin urinën dhe qumështin e tyre. Ata shkuan dhe, pasi u shëruan, e vranë bariun e Pejgamberit ﷺ, i morën kopenë me deve (dhe ia mbathën). Lajmi për ta erdhi gjatë paradites. Pejgamberi ﷺ dërgoi dikë në kërkim të tyre dhe, në mesditë, i sollën para Pejgamberit ﷺ. Ai urdhëroi t'ua prisnin duart dhe këmbët, t'ua damkosnin sytë, pastaj i hodhën në gurishtën (e Medinës). Kërkonin ujë, por nuk u jepej.”

Ebu Kilabe thotë: “Këta vodhën, vranë, bënë kufër (mosbesim) pas imanit dhe e luftuan Allahun dhe të Dërguarin e Tij ﷺ.”