Hadithet e ngjashme me hadithin 1213

Abdullah ibn Jusufi na ka thënë: Na ka rrëfyer Maliku, e ky nga Nafiu se Abdullah ibn Omeri (Allahu qoftë i kënaqur me ta!) tregon se i Dërguari i Allahut ﷺ pa pështymë në mur, në drejtim të kiblës. Ai e fshiu atë dhe u kthye nga njerëzit e tha: “Kur dikush falet, të mos pështyjë përpara vetes, sepse Allahu është përpara tij teksa falet.”

Kutejbe ibn Seidi na ka thënë: Na ka treguar Lejthiu, e ky nga Nafiu se Ibn Omeri (Allahu qoftë i kënaqur me të!) tregon se, teksa Pejgamberi ﷺ po ua falte njerëzve namazin, pa një pështymë në kiblën e xhamisë, andaj e fshiu. Pasi e kreu namazin, tha: “Kur dikush është në namaz, e ka Allahun përpara vetes, andaj, gjatë namazit, askush të mos pështyjë përpara vetes.”

E transmeton Musa ibn Ukbe dhe Ibn Ebu Verradi nga Nafiu.

Sulejman ibn Harbi na ka thënë: Na ka treguar Hamadi, e ky nga Ejubi, e ky nga Nafiu se Ibn Omeri (Allahu qoftë i kënaqur me të!) tregon se Pejgamberi ﷺ pa këlbazë në xhami në drejtim të kiblës, andaj u zemërua me të pranishmit në xhami dhe u tha: “Allahu është përpara jush gjatë kohës sa jeni në namaz. Andaj, mos pështyni, - ose ka thënë: mos nxirrni këlbazë (gjatë namazit) -.” Pastaj zbriti dhe e fshiu me dorë.

Ibn Omeri thotë: “Kur dikush pështyn, le të pështyjë majtas.”